Feira to tiår med spark, styrke og samhald
Tjue år har gått sidan Kvam Karateklubb vart etablert. Det vart feira med kake, kampar og karatetrening i toppklasse denne helga.
Små og store i karatedrakter susa rundt i aktivitetssalen på Kvam ungdomsskule då HF var innom fredag ettermiddag. Eit par av dei såg ut til å varma opp, nokre bar på bord og gjorde klart og andre samla seg rundt ein mobilskjerm i eit hjørne. Midt i rommet låg ei stor matte. Då det vart gjeve teikn til at det var tid for å starta markeringa, var det ein disiplinert gjeng som stilte seg opp.
Klubben valde å markera dei tjue åra med arrangement gjennom nesten ei heil veke. Programmet fredag inneheldt ein intern cup, kake og pizza. Ordførar Torgeir Næss, som sjølv har trena karate, fekk æra av å opna cupen.
For alle aldrar
Ordføraren vil anbefala sporten til alle. Ein vert ikkje berre sterkare i kroppen, men også i hovudet. Ein opplever betre sjølvkontroll og sjølvdisiplin, og ikkje minst får ein trena på respekt og orden, sa han.
– Så er det kjekt og sosialt òg. Ein får vener, kanskje for livet.
Det kan Helge Fonneland Bu, som er hovudinstruktør i klubben, skriva under på. Han har vore medlem i klubben i 18 år, og fortel om eit godt miljø, trass i stor alderskilnad mellom medlemene.
Offisielt seier klubben at ein kan byrja med karate det året ein fyller åtte år. Nokre yngre born i det Bu kallar «karatefamiliar», har likevel fått tillating til å vera med. Den yngste medlemen er fire år. Sidan starten har talet på medlemer stort sett halde seg mellom 40 og 60.
– Me har vore opp i 90 medlemer. Då var me Noregs femte største klubb, fortel han.
– Ei stor ære
Feiringa starta allereie tysdag. Då var medlemene samla i Hardangerbadet, både til trening og ei uoffisiell tevling i vassklia. Torsdag vart det halde cuptrening og trening for domarar, før jubileumshelga sette inn for fullt.
Laurdag morgon – då kaka frå fredagen for lengst var fortært – fekk medlemene trena saman med Bu og ein av Noregs høgast graderte i karate, Kjetil Skippervik Eidsnes. Han er innom klubben med jamne mellomrom, seier Bu. Eidsnes er veldig dyktig, og har 30 års erfaring innan shotokan karate i Noreg, fortel han.
– Det er ei stor ære å ha han her.
Også sundag venta klubben storfint besøk. Då vitjar Emil Clementsen frå den tekniske komitéen i JKA Norway (Japan Karate Association Norway) aktivitetssalen. Bu omtalar han som «the big boss» innan karate i Noreg.
Sjå fleire bilete her:
