Feira ny hall: – Her er fasilitetane på eit heilt anna nivå
Bordtennis, kaker og ordførarbesøk stod på programmet då Hardanger Bordtennisklubb offisielt opna den nye bordtennishallen i Steinsdalen.
Hallen, som har fått namnet Hardanger bordtennishall, har vore i bruk sidan august, men opna offisielt fyrst onsdag.
Opninga var open for alle. Sportsleg leiar i klubben, Håvard Markhus, er overtydd om at nærare åtti hadde møtt opp.
– Når du arrangerer noko som ikkje har påmelding, er du alltid spent på kor mange som kjem. Kjem det 10, kjem det 20? Her kom det langt fleire enn eg hadde rekna med. Me får berre håpa det er nok kake til alle, seier han.
Ordførar Torgeir Næss tok hand om den offisielle delen av opninga. Denne gongen var den tradisjonelle snora erstatta med eit gammalt bordtennisnett.
I talen fortalde ordføraren at bordtennis var ein av hans favorittaktivitetar då han var ung. Han pla skubba eit kjøkkenbord inntil kjøkenvindauga og spela på bordet med vindauga som motstandar.
– Eg kunne stå og slå ballen mot vindauga i timevis. Det var sikkert frykteleg for dei som måtte høyra på, men eg utvikla ein viss ballteknikk. Her er fasilitetane på eit heilt anna nivå. Det må vera fantastisk å spela under slike forhold. Eg trur både utøvarar og bygdefolk vil setja pris på denne arenaen. Me skal setja pris på eldsjelene i klubben. Kva hadde Kvam vore utan slike folk? Det som skjer i denne hallen, er ein del av den mosaikken som utgjer eit levande og attraktivt lokalsamfunn, sa ordføraren.
