Feira jubileum med opprykk og søtsaker

Hardanger Bordtennisklubb rykkjer opp frå 5. til 4. divisjon.

Sigbjørn Linga Bladstyrar

Publisert 06.02.2024 - 11:00

Opprykket vart klart etter dei to seriekampane i helga, der 3.-laget til klubben slo både Bergen PIL 4 og Heros 4 på heimebane i gymsalen i Steinsdalen.

I alt 20 singel- og dobbelkampar vart avvikla i bordtennishallen i Steinsdalen laurdag. Her er Kristoffer Fonnaland (nærast t.v.), Jeannette Huttenlocher (i midten, t.v.) og Gustar Korshavn Vikesdal (bakarst, t.h.) i aksjon. Nærast sit domar Lars Henrik Mo og Liam Amir Jamal (t.h.).

For laget stilte Gustav Korshavn Vikesdal, Felix van der Leest, Aodne Valland og Kaleb Mong opp. Dei slo fyrste Heros 7–3, før det vart 8–2 mot Bergen PIL 4. Allereie før dei siste seriekampane i mars er fråstanden ned til neste lag på tabellen så stor at ingen kan ta att laget.

Annonse

Også 2.-laget var i sving i den same divisjonen laurdag. Kristoffer Fonnaland, Lars Henrik Mo, Liam-Amir Jamal og Jeannette Huttenlocher slo Bergen PIL 4 med 7–3, før det vart 4–6-tap mot Heros 4. Fleire av kampane var jamne. Laget ligg på 3.-plass av dei 5 laga på tabellen.

Liam-Amir Jamal la bort fotballen og satsa på bordtennis. No har familien sikra seg eit av dei kasserte bordtennisborda til klubben, som førebels har plass i garasjen.

Bordtennisklubben fylte fredag 37 år, noko som vart markert med gratis frukt og sjokolade til alle som deltok i kampane i helga. Ifylgje sportsleg leiar Håvard Markhus har klubben nokre færre aktive enn førre sesong, men framleis fleire enn då klubben hadde base i Norheimsund idrettshall.