Feira 30 år på skøyter
Hardanger Skøyteklubb feira 30-årsjubileum og eit nytt grindbygg på Vikøy-evja måndag 25. september.
Det opplyser stiftar og trenar i klubben, Brynjulf Måkestad i ei pressemelding.
Klubben vart altså etablert i 1993. Han fekk raskt medlemmer frå Mundheim, Strandebarm, Tørvikbygd, Norheimsund og Øystese. Det vart treningar to gonger i veka i Norheimsund Idrettshall. Om vinteren køyrde foreldra i klubben borna til Slåtthaug Kunstisbane i Bergen.
I 1996 vart Kvammameisterskapen skipa til på Bergsvatnet i Tørvikbygd, med hundre deltakarar. Brigt Rykkje var medlem i klubben frå 1996 til 2000. Han fekk fleire gode plasseringar i verdscupen, EM, VM og OL. Cecilie Anderson tok bronse på 1.000 meter i landsmeisterskapen i 1999.
Klubben fekk løyve frå kommunen til å oppretta rulleskeisebane ved kyrkja i Norheimsund. Han fekk 100.000 kroner i tippemidlar til asfaltering, og banen stod ferdig i 2005.
Kvammameisterskapen vart arrangert her i både 2010 og 2013. I 2016 vedtok Kvam herad å byggja ny barnehage på banen. Det førte til at klubben var utan treningsbane i to år.
Etter mykje rekognosering fann Måkestad ein ny plass for bane i Vikøy, men det tok tid før formalitetane vart avklara. Kvam herad garanterte for tippemidlar. Sparebankstiftinga Hardanger og Sparebanken Vest løyvde pengane som trongst for å fullfinansiera prosjektet. Banen på den tidlegare evja vart opna i juni 2019.
Barnehagar, skular, idrettsskular, Fana Idrettslag og turistar er mellom dei som har nytta banen. Klubben har arrangert fire kvammameisterskapar på rulleskøyter i Vikøy. I fjor kom det på plass lysmaster.
Måkestad er takksam for både økonomisk hjelp og dugnadshjelp, og takkar alle som har samarbeidd om klubben og dei aktive gjennom 30 år.
– Utan godt samarbeid hadde me ikkje fått dette til, skriv han.
Klubbleiaren fekk i høve jubileet ei blomehelsing frå avdelingsbanksjef May Turid Tømmervik i Sparebanken Vest og Aasne Vikøy i klubben.
