Eittmålstap for topplag
To spelarar vart forviste frå banen då Øystese/Norheimsund tapa for serietoar Arna-Bjørnar.
Gjestene frå Kvam tok leiinga då Marcus Dalseide skåra etter vel eit kvarter av bortekampen i 4. divisjon laurdag. Ikkje mange minutt seinare utlikna heimelaget, før vertane fekk ein spelar utvist før pause. Likevel tok dei leiinga etter pause.
Gabriel Ramsay fekk etter ein times tid gult kort nummer to for dagen og fekk same lagnad som spelaren på heimelaget. Sidan vart det korkje fleire mål eller fleire raude kort, og resultatet vart 2–1.
Kvemmingane ligg framleis sist på tabellen med 6 poeng, men vegen til lysare tider er kort. 4 lag har 7 poeng. Torsdag 15. juni er heimekamp mot Voss i vente.
Sundag spela Norheimsund/Øystese 2 0–0 i ein bortekamp mot Tertnes 2. Det var fyrste gong i år at laget heldt nullen. Laget har 4 poeng etter 9 kampar og ligg nedst på tabellen, med 6 poeng opp til nettopp Tertnes 2 rett over nedrykksstreken. Fredag kjem topplaget Fotlandsvåg til Kvam.
I ein tidlegare versjon av artikkelen vart det opplyst at neste heimekamp for A-laget er 14. juni. Det er feil og vart retta 12. juni kl. 08.03. Red.
