– Eit spesielt hjarta for sporten
Charlotte Svendsen frå Norheimsund vart nyleg kåra til «Årets ildsjel» av Det Norske Travselskap (DNT).
– Prisen «Årets ildsjel» for 2023 vert gjeven til ein person som har eit spesielt hjarta for montésporten, skriv DNT på nettsida.
Monté er travløp der hesten har ryttar i staden for vogn og kusk. Svendsen har tilført både nye og etablerte utøvarar kompetanse, ferdigheiter, motivasjon og meistring gjennom kursing og trening på sin eigen montéskule, opplyser travselskapet.
Svendsen vaks opp i Steinsdalen, men har halde til i Rogaland dei siste åra. Der har ho vore med i Stavanger Travklubb i Rogaland Travforbund. Under DNT sitt innlegg om prisen på fjesboka takkar Svendsen for gratulasjonar, og skriv at prisen kom overraskande på.
– Men samstundes er eg veldig takknemleg og stolt, skriv ho.
«Årets ildsjel» skal ifylgje travselskapet gå til ein person som gjer ein solid og positiv innsats i lokalmiljøet for travlaget og travsporten. Dessutan skal arbeidet ha vore prega av frivillig innsats og tufta på openheit, tillit, «fair play» og respekt. Personar som får utmerkinga, er altså lokale kvardagsheltar, skriv DNT.
