Eit årleg dugnadslyft

Faktisk var 108 påmelde, men nokre melde forfall. Bortimot ein firedel av deltakarane i år – 23 i talet – representerte arrangøren, Hardanger Bordtennisklubb. Dei resterande deltakarane kom frå 11 andre klubbar i Hordaland, Rogaland, Agder og Vestfold.

Så mange kom at dei 18 bordtennisborda i Norheimsund idrettshall ikkje strekte til. Eit par bord måtte plasserast i amfisalen, slik at det totalt vart 20 speleflater.

Frivillige krefter

Dugnad er eit nøkkelord når såpass store arrangement skal avviklast. Bente Maubach ville helst peika på Jeannette Huttenlocher i kiosken som den største drivkrafta, medan Huttenlocher peika tilbake på Maubach.

Uansett utgjer dei to til saman eit lite dugnadsutval som spelar ei sentral rolle i organiseringa av dei frivillige bordtenniskreftene. Mellom oppgåvene over tre dagar i helga var å køyra og bera utstyr til hallen og kiosken, rigga opp bordtennisbord og skiljevegger, og rigga alt saman ned att etterpå.

Huttenlocher understrekar at ho har mange gode hjelparar med seg i arbeidet. Nærare bestemt var grovt kring tjue personar med, opplyser klubbleiar Håvard Markhus.

Tilbake i toppen

Sportsleg hevda fleire av dei lokale deltakarane seg. I herrar F – den lågast rangerte herreklassen – vart Lars Henrik Mo nummer 2 etter 2–3 tap i finalen mot Polina Varenuk. Han sikra seg dimed ein ny pokal, eksakt 30 år etter at han vann den førre pokalen i den same turneringa. I 1994 vann han vel å merka klassen.

– No går eg for ein ny pokal i 2054, seier Mo, som har kunngjort det ambisiøse målet på Facebook.

Han var borte frå bordtennisen i om lag 25 år, men vart «narra» med att for eit par år sidan – og er glad for det.

– Ein må ha noko å driva med, og så må ein stilla opp litt, veit du. Miljøet er veldig godt, seier Mo, som understrekar at sporten er eigna for alle, uavhengig av dugleiksnivå.

I same klasse som Mo vart Aodne Valland nummer 3 etter tap for nemnde Varenuk i semifinalen. I gutar/jenter 15 vart Gustav Korshavn Vikesdal nummer 3, og broren Frede vart nummer 3 i gutar/jenter 13. Same plassering fekk Kaleb Mong i klassen for 11-åringar. I dobbelklassen for gutar og jenter vart Liam-Amir Jamal og Mohamed Basem Farah nummer 3. I dobbelklassen for herrar og kvinner vart Jack Feng og makker Thomas Sætre frå Bergen PIL nummer 3.

Turneringa, leia av nemnde Feng, romma 14 klassar, og spriket i både dugleiksnivå og alder var stort. Til dømes var EM-, VM- og Paralympics-deltakar Aida Husic Dahlen frå Randesund med. Gapet mellom den eldste og yngste deltakaren var heile 75 år, opplyser Hardanger Bordtennisklubb på hbtk.no.

Sjå fleire bilete frå Norheimsund Open her: