Eirik Ulltang stakk av med NM-gullet i helga: — Eit førebilete

Etter å ha venta i om lag to år, kunne Hardanger Sykkelklubb si trialgruppe ynskja deltakarar og publikum velkomne til noregsmeisterskap og -cup i biketrial i helga. Arrangørklubben gjorde ferdig dei siste førebuingane fredag.

Sondre Stranden Rosten og Eirik Ulltang er trenarar for Kvam Biketrial. Ulltang fortel at det heile har skjedd ganske fort, og at klubben har hatt to—tre veker på seg til å få alt på stell før helga. For Ulltang er ikkje dette ein uvanleg situasjon å vera i.

— Alt skjer i siste liten, men det er ikkje noko nytt. Alt i livet mitt har stort sett vore sånn, men det ordnar seg alltid til slutt, fortel den aktive syklisten.

Dei yngste utøvarane i alderen 6—15 år var fyrst i elden. Frå arrangørklubben stilte alle utøvarane til start. I gruppa er det to jenter og ni gutar totalt.

Tek ikkje skrekken

Bella Honningsvåg frå Øystese er ei av dei to jentene i biketrialgruppa i Kvam. Ho kosa seg på tilstellinga, og hadde allereie testa fleire av løypene då ho snakka med HF laurdag. Nokre hadde gått bra, andre har vore litt meir trøblete.

— Eg har prøvd tre løyper. Den eine var litt vanskeleg. Då fekk eg null poeng, seier ho.

Trass lite poeng lét ho seg ikkje stoppa. Ho var klar for meir og trakka av garde på sykkelen, på jakt etter ein ny seksjon.

Mor til Bella, Katrine Honningsvåg, var ei av dei som hjelpte til i helga. Ho fylgde etter syklistane, tok tida og noterte poeng. Ho snakkar varmt om den lokale sykkelklubben.

— Borna spøkjer, ler og kosar seg på trening. Dei verkar å ha det veldig fint saman, fortel ho.

Honningsvåg tykkjer at borna er nokre tøffingar, og fortel at dei er flinke til å koma seg opp att på sykkelen dersom dei hamnar i bakken.

— Det kan verta litt klaging, men Bella gler seg alltid til neste trening, seier ho.

Sondre Tveiterås er ein av dei aktive gutane i den lokale trialgruppa. Han sat på sykkelen medan han venta på at det var hans tur til å sleppa til i den eine løypa. Det Sondre likar best med sporten, er at han får utfordra seg sjølv. Han seier at han har krasja skikkeleg éin gong, men har ikkje teke skrekken.

— Eg berre reiste meg opp att og sykla vidare. Det var ikkje så ille, seier han.

Den unge, sykkelglade guten seier at han har det kjempekjekt på trening. Han er godt nøgd med trenarane sine, og fortel at Ulltang gjer ein god jobb.

— Han er snill og flink til å forklara kva me skal gjera. Han er eit førebilete, seier Sondre.

Bør ha trialsyklar på skulen

Vilde Holstad Tronstad er den andre av dei to jentene i sykkelgruppa. Ho er ny i sporten, og fortel at ho ikkje har vore med på mange treningar før arrangementet i helga. Det ho likar best med syklinga, er at ho lærer nye triks. Vilde har allereie lært seg å stegla høgare med sykkelen, noko ho tykkjer er stas. Ho ynskjer at fleire jenter skal prøva sportsgreina og har ein tanke om kva som må til for at det skal skje.

— Det hadde vore bra om me fekk ta med syklar på skulen som me kunne ha «triala» på i skuletida. Då ville kanskje dei andre ha sett på og tenkt «wow, det ser gøy ut!», fortel Vilde.

Også ho har krasja med sykkelen, men som Sondre har heller ikkje ho vorte skremt vekk. Tvert om.

— Når eg har uhell, lærer eg korleis eg ikkje skal gjera det, seier den unge syklisten.

Noregscup og NM same helg

Båe dagar var det Ulltang som sanka flest poeng og hamna øvst på resultatlista i klassen elite (16+). Den nybaka noregsmeisteren fortel at det er ei smal idrettsgrein med få deltakarar. I helga var det seks deltakarar i klassen. Av dei som vel å halda fram med sporten, er det fleire som vert veldig gode, fortel Ulltang. Han ynskjer at fleire skal få auga opp for biketrial.

— Me prøver å gjera idretten synleg og gjera det enklare for andre å prøva syklinga. Dei som ynskjer, kan låna sykkel og vera med på ei trening eller to gratis. Me tenkjer på å laga til nokre treff for dei som er heilt nye, slik at terskelen for å prøva seg gjerne vert lågare, fortel Ulltang.

Sykkelgruppa sin andre trenar, Rosten, kunne også smykka seg med ein gullmedalje i helga. Han var åleine i klassen master (30+).

Før arrangementet laurdag opplyste Ulltang at det var 23 påmelde. Fordelinga var jamn mellom dei yngste og dei eldste. Vel halvparten deltok i klassane junior, sport, master og elite, medan resten deltok i klassane for born og unge i alderen 6—15 år. Dei sykla ulike seksjonar med ulike vanskegrader begge dagar.