– Ei verdfull oppleving

Det enda ikkje uventa med eit nederlag for vertskapet i 8.-delsfinalen i noregsmeisterskapen laurdag ettermiddag. Dit tok A-herrelaget til Rossvoll Volleyballklubb, som held til i 1. divisjon, ved å slå Kristiansand Sandvolleyballklubb 3–1 i 16.-delsfinalen 12. oktober.

Medan sørlendingane spelar i 2. divisjon, er BK Tromsø ein merittert klubb i Mizunoligaen, som den øvste divisjonen heiter. Klubben har mellom anna ti NM-titlar på cv-en.

Mykje meir nøgd

Sjølv om det vart eit nokså klart tap i kvart sett og 0–3-tap i Øystesehallen, gjekk spelande trenar Jon Erlend Haukås frå hallen med eit smil om munnen. Han var mykje meir nøgd med innsatsen laurdag enn etter 8.-delsfinaletapet for TIF Viking i fjor.

– Me visste at me kom til å tapa kampen, men hadde lyst til å prøva å spela så godt me kunne og ikkje vera feige. I fjor var me feige og spela ein frykteleg dårleg kamp. Me torde ikkje å dra til og var passive i mottak. I dag løyste me oppgåva mykje betre. Det var ei veldig verdfull oppleving for alle på laget, seier han.

Heimelaget hang best med i det fyrste settet. Haukås meiner det ofte vert slik i kampar der det eine laget er storfavoritt. Då vil heimelaget gjerne gå ut i hundre, før gjestene, som kanskje kan ta litt lett på det frå starten, vaknar og etter kvart dreg frå.

Haukås sjølv trakka over i kampen mot sørlendingane, men makta ikkje å dempa iveren og halda seg unna parketten i heile kampen. Sjølv med ein godt teipa ankel var han noko hemma.

– Eg klarar ikkje å hoppa for fullt og koma høgt nok opp, men eg var kanskje på 80 prosent, seier Haukås.

Noko å strekkja seg etter

Laget hans er veldig ungt. Bortsett frå han sjølv og Martin Mjelde Bjelland er dei fleste spelarane i alderen 16–18 år. Ein av dei som fekk prøva seg mot toppspelarane frå nord, og som spela sin fyrste kamp på dette nivået, var Eskild Storm Eikrem (16).

– Det var veldig kjekt. Eit nytt nivå å spela på, samanlikna med det me er vane med. Det merka eg alt før den fyrste ballen gjekk. Det var konsentrasjon i alt dei gjorde, seier han.

– Kva lærte du av kampen?

– Korleis nivået deira er samanlikna med vårt, og at det er mogeleg å nå det nivået om ein held fram. Og det har eg verkeleg lyst til, seier 16-åringen.

Han har spela sidan slutten av barneskuletida og har vorte veldig glad i sporten.

– Når ein fyrst synest det er kjekt, kjem resten av seg sjølv, seier han.

Saman med U19-laget reiste han sundag til Knarvik for å spela meir volleyball. Og komande helg ventar ein ny kamp for A-laget. Då kjem Volda til Kvam.

– Bra grunnspel

Hovudtrenaren til Tromsø, Vitor Macedo, var ikkje med til Kvam, men det var assistenttrenar Harry Fagervold. Lagleiaren synest kampen var god og at grunnspelet til Rossvoll var ganske bra.

– Spesielt mottaksspelet deira var stødig, men dei gjorde litt fleire feil enn oss. Det handlar om erfaring og nivået me spelar på. Dei gav oss god kamp, så det var jamt fram til cirka 15 poeng. Men me heldt trykket oppe heile vegen, når dei duppa litt, så det vart nok litt større margin enn det såg ut til lenge, seier Fagervold.

Med seg til Kvam hadde han mellom andre Petter Alstad Østvik, som har returnert til Tromsø etter ei årrekkje som proff i fleire land.

Fagervold har etter kvart vore mange stader på kamp, men aldri i Hardanger.

– Det var på tide. Rossvoll er ein kjend klubb, og me hadde ein fantastisk køyretur frå Bergen hit, seier Fagervold, som av naturlege årsaker er van med lange reiser.

Sjå fleire bilete frå oppgjeret her: