– Eg trur folk har sakna oss
Tre månader etter at Hardangerbadet vart koronastengt, er det endeleg aktivitet i vatnet att.
Hardangerbadet opna att måndag. Guro Øvsthus Kolltveit fekk æra av å vera den første kunden etter «nyopninga».
– Eg har vore ein ivrig brukar av Hardangerbadet og er veldig glad for at bassenga er opne att. Eg trur folk har vorte så flinke når det gjeld smittevern at eg ikkje fryktar koronasmitte, seier ho.
– Det er trygt
Driftsleiar Gunn Hilde Øymo fortel at hennar inntrykk er at folk har sakna Hardangerbadet. Ho er overtydd om at badet vil få mange gjester i sommar. I alle fall på dagar med dårleg vêr.
Øymo trur det er liten fare for å verta smitta medan ein badar.
– Vatnet er fullt av kjemikaliar som tek knekken på virus. I badstova er det for varmt til at viruset kan overleva. Det er garderobane som utgjer den største smittefaren. Det er dei me må ha kontroll på, seier ho.
Mange restriksjonar
For at gjestene ikkje skal verta smitta, har badet innført restriksjonar. Øymo fortel at enn så lenge tek bassenga berre imot 90 gjester om gongen, altså halvparten av det anlegget har kapasitet til. Gjestene får ikkje vera lenger enn to timar i bassenget. Dessutan krev Hardangerbadet mellom anna at gjester som skal nytta garderobane, treningsrommet eller kafeen, spritar seg når dei kjem. Alle som skal bada, må som vanleg vaska hår og kropp utan badetøy før dei går ut i bassenget og før dei går heim.
Ingen får ta personlege eigedelar med seg i bassenga. Alle gjester må desinfisera alle overflater dei har teke på. Dei som badar, kan ikkje nytta leikene og symjeutstyret til Hardangerbadet.
Gjenstandar som vert gløymde att, vert kasta når badet stenger. For å ha minst mogleg kontakt med kundane over disken, vert alle oppmoda om å kjøpa billettar på nettet.
