Dugnad med smell i

Eit stort arrangement som noregscupen er eit stort puslespel med mange små brikker. Mange tital frivillige var i sving for å leggja til rette for at dei nær tusen skyttarane skulle få fyra av dei 25 eller 35 obligatoriske skota i Odda, Hardanger og Jondal. HF tok turen for å visa fram nokre av dei som var i aksjon fredag.

Dei gule vestane

Det fyrste sporet av tevlinga i Vangdalsåsen trefte ein allereie i Norheimsund sentrum, der Oddvar Steine hadde sett opp skilt som leia skyttarane inn på rett veg.

Viggo Venn hadde truleg kjent seg heime om han hadde vitja Vangdalsåsen dei siste dagane. Allereie ved avkøyrsla til Heradstveit møtte me den fyrste gule vesten. Trafikken på den smale, kommunale vegen vart regulert for å unngå at campingvogner og bubilar skulle skapa kaos.

På sjølve parkeringsplassen tok Leif Skår, ein annan frivillig, imot oss med eit smil. Han peika oss i retning ein ny gul vest, og me vart trygt dirigerte til ein ledig campingplass.

Mange små bitar

Og slik heldt det fram: På kjøkenet var fleire unge damer, under leiing av Laila Skogesal Ditmarsen, i sving med å steikja vaflar, koka kaffi og varma pølser.

På standplassen på 100-metersbanen heldt veteranane Johannes Skaar Bakke og Asbjørn Hestad oppsyn med skyttarane både før, under og etter skyting, medan Andrea Kirkevold i bua til standplassleiaren med roleg røyst spurde om skyttarane var klare. Med ryggen til henne i nabobua, sat Jon Olav Bjørke og gjorde same den jobben på 200-metersbanen, med Kjetil Skår som ein av kontrollørane på sjølve standplassen.

Sjå fleire bilete frå dugnaden og stemnet i Vangdalsåsen her:

Eit steinkast frå standplassane heldt Magne Lysen, Åmund Kolltveit og Terje Mo Bjørklund orden på avviklinga av noregscupen i stang- og felthurtigskyting, dei to kanskje mest actionfylte øvingane i skytesporten.

Sjå video frå stangskyting her:

Bjørklund såg til at framferda på standplassen var som han skulle vera, medan dei to andre sytte for standplassleiing, å trykkja på dei rette knappane i datasystemet og registrera resultat. Her var tempoet mykje rolegare enn på hovudbanen, og det kunne gå ei stund mellom kvar pulje med inntil fem skyttarar kom innom. Årsaka er at berre ein liten del av skyttarane deltek i desse greinene, fortel Kolltveit.

Ifylgje Arve E. Kolltveit og Dag Skår i skyttarlaget, som HF fekk nokre ord med fredag, hadde arrangementet og puslespelet gått smertefritt så langt. Risiko for torevêr på den fyrste stemnedagen, på kvelden onsdag, medførte ei lita seinking i programmet av di ein ikkje kunne ta sjansen på skadar i det elektriske anlegget. Nett slike tilhøve rår ikkje eingong dei gule vestane i skyttarlaget over.

– Me får veldig mykje skryt for anlegget og arrangementet, og det er kjekt, seier Kolltveit.

Heldt orden i sakene

I motsetnad til dei to andre arrangørane opna Hardanger Skyttarlag for at gjester i både bubilar og campingvogner – og dei er det mange av – kunne køyra heilt opp til banen. Parkeringsplassen ved banen er nemleg stor nok til at ein med eit visst omlaup i bilane har nok plass til alle.

Slik er det ikkje i Jondal. Ikkje minst på grunn av den bratte bakken i vegen til skytebanen vart eigarane bedne om å setja campingvognene frå seg ved Jondal skule. Resten av køyretøya sytte parkeringsvakter for å losa inn på parkeringsplassen ved banen i Gjeskadalen.

Hadde ein sleppt campingvognene opp, hadde det fort vorte både kaos langs vegen og plassmangel ved banen, konstaterer Jo-Bjørnar Håvik, som hadde «vakt» saman med Gaute Selsvik då me vitja banen fredag. Håvik fortalde om ei udramatisk trafikkavvikling så langt.

På vaktlister var alle oppgåver sirleg fordelte. På stemnekontoret i skyttarhuset var eit lite arsenal av frivillige med raude noregscupskjorter i sving med ymse gjeremål kring lunsjtid fredag. Bjørnar Wikane, som saman med Bjarne Sollesnes var speaker denne dagen, opplyste at tilskipinga hadde gått heilt fint. Anlegget gjekk klar torevêret onsdag kveld, sjølv om Wikane fylgde litt spent med på «lyn-appen» då uvêret nærma seg. Noko trøbbel med elektronikken var det einaste som elles var å melda av avvik.

Ein av dei med raud t-skjorte på kontoret var skyttarlagsleiar Jarle Harkestad. Han vedgår at han har teke på seg eit stort ansvar ved å hoppa etter Bjarne Sollesnes. Med god hjelp frå både den tidlegare leiaren og andre røynde krefter går det likevel greitt å avvikla eit stort arrangement, fortel han.

Sjå fleire bilete frå dugnaden og stemnet i Jondal her:

Frå Nordmøre til Hardanger

Ein av dei nær tusen som var innom minst éin av dei tre banane torsdag og fredag, var Bjørn Haugen frå Valsøyfjord Skyttarlag på Nordmøre. HF trefte han i full gang med våpenstell og førebuingar utanfor campingvogna i Vangdalsåsen torsdag kveld.

Då hadde han skote fyrst i Odda og så i Jondal, før han måtte overnatta for å få med seg siste konkurranse i Kvam kring lunsjtid fredag. Deretter skulle han setja kursen mot Voss for å delta på Landsskyttarstemnet.

– Det er flott at me får koma hit og bu etter å ha skote to stemne. Det er eit fantastisk anlegg dei har her, seier den blide V65-skyttaren.

Rekrutt slo til

Konkurransen i noregscupen er knallhard, så det vart ikkje fleire enn éin «heimesiger» til dei lokale skyttarlaga på dei tre stemna. Ella Måkestad frå Hardanger vann rekruttklassen i Vangdalsåsen med 350 poeng og 23 sentrumstiarar, i kamp mot 54 andre.

I Jondal presterte Jonas Bjørke same sum i juniorklassen. Det gav han 3.-plassen. 3 plassar lenger ned på lista, med 349, kom Kristine Solheim Wikane frå Jondal. Den same summen heldt til 3.-plass i Odda. Bjørke vart med 349 poeng nummer 5 på heimebane i Vangdalsåsen.

Det vart dessutan ny banerekord på 200 meter i både Odda, Jondal og Vangdalsåsen. I Jondal klinka noregscupleiar Daniel Sørli til med fullt hus og 350 poeng med 21 innertiarar i klasse 3–5, noko som heldt til siger med det som i skytesporten vert sett på som ein solid margin: 1 poeng. Tevlinga i Kvam vart vunnen av Ingeborg Rosøy frå Heim/Hemne. Ho var ein av få skyttarar som skaut på den aller siste stemnedagen laurdag. Ho slo til med personleg rekord – 349 poeng – og kapra 1.-plassen.

Det seier kanskje sitt om nivået i noregscupen at heimefavoritt Liv Sollesnes med 345 poeng hamna på 37.-plass i Jondal. I Vangdalsåsen vart ho nummer 22 med 346 poeng, medan Dag Skår med same sum og fleire innertiarar kapra 17.-plassen.

I klasse V73 er berre 350 poeng godt nok til å vinna, så spørsmålet er oftast berre kor mange innertiarar dei beste skyttarane presterer. Her vart Asbjørn Hestad frå Hardanger nummer 6 av 80 i Jondal. Både Arne Berge frå Hardanger og Sverre Krutnes frå Jondal presterte 350 poeng i klassen i Vangdalsåsen, men det gjorde også 12 andre. Presisjonsnivået heldt såleis «berre» til høvesvis 9.- og 14.-plass.

Alle resultat frå dei tre arrangørane finn du her.