Drøymer om ei solrik vinterferieveke
Vinterferien står for tur. Leiarane for dei to skisentera på Kvamskogen kryssar fingrane og håpar på velvilje frå vêrgudane.
Snøen kom tidleg i år. Det har gjeve skisentera ein god sesongstart.
– Det er ikkje kvart år me kan ha ope i romjula. I år var romjula betre enn på mange år, fortel Jan Guttorm Skeie, dagleg leiar i AS Kvam Fjellheisar, verksemda som driv Furedalen Alpin.
Brysam vind
Også januar byrja bra, men etter den gode starten vart vêret meir ustabilt.
– Snø er det nok av, men me har ikkje kunna ha ope så mykje som me ønskjer på grunn av sterk vind, fortel Skeie.
Inflasjon og høge renter ser ikkje ut til å ha påverka lysta til å stå på ski.
– Når me har vore ope, har det vore mykje aktivitet. Det ser ut til at folk framleis brukar pengar. Til dømes har me selt rekordmange sesongkort. Talet er mellom 40 og 50 prosent høgare enn i førre sesong, seier Skeie.
– Ny rekord
Dagleg leiar i Eikedalen Skisenter AS, Fredrik Tønjum, fortel ei liknande historie. Også i Eikedalen har vinden skapt problem, men når senteret har vore ope, ser ikkje dyrtida ut til å ha påverka kundestraumen.
– Romjula var uvanleg bra. Laurdag 30. januar hadde me fleire enn 3.000 gjester. Det er truleg den best besøkte dagen nokon gong. Sidan ikkje alle heisane var i drift, vart det kø og litt kaos. Også førehandssalet av sesongkort var blant dei beste me har hatt. For meg ser det ikkje ut til at inflasjon og høge renter har påverka kundane, seier han.
Invasjon frå utlandet
I Furedalen skilde veka frå 12. til 18. februar seg ut.
– Mange land i Europa hadde vinterferie. Det merka me på talet på danskar, nederlendarar og engelskmenn i anlegget. Mange skuleklassar og storfamiliar frå desse landa leigde hytter på Kvamskogen denne veka. Truleg var om lag halvparten av alle gjestene utlendingar. Det er ikkje uvanleg med utlendingar i bakken, men denne veka var talet uvanleg høgt, fortel Skeie.
I Eikedalen hadde dei ikkje det same innrykket.
– Me heldt stengt fleire dagar denne veka, og merka ikkje like mykje til utlendingane, seier Tønjum.
– Yr bestemmer
Neste veke er det vinterferie. Ifølgje Tønjum kan ei god vinterferieveke utgjera om lag 20 prosent av årsomsetninga i Eikedalen.
– På mange måtar er det yr.no som styrer besøkstala våre. Anten meteorologane har rett eller tek feil, har vêrmeldingane mykje å seia for kor mange som kjem, seier Tønjum.
Skeie er samd.
– Alt kjem an på vêret. Fint vêr gjorde at vinterferieveka vart veldig bra i fjor. I år ser langtidsvarselet greitt ut. Me får håpa det slår til, seier han.
