Droppa e-cup – prioriterte eksamen- vurderar hinder

– Me var lova god fart i Frankrike, så mitt klare mål før helga var å gå for EM-kravet. No har eg berre litt over ei veke til min siste eksamen på medisinstudiet, så eg valde difor å verta heime, seier Lillefosse, som ikkje kjem til å konkurrera før etter legestudiet er ferdig.

Kvemmingen har fått plass på eit stort internasjonalt stemne i Leiden i Nederland 11. juni. Det vert fyrste seriøse forsøk på å stetta EM-kravet denne sesongen

– Her er det lova fartshaldarar av høg klasse for å hjelpa oss fram til gode tider. Då vert alt mykje enklare, seier Lillefosse, som har EM i München i slutten av august som det store målet denne sesongen.

Kravet er 28.15 minutt. Bjørnar har 28.23 som personleg rekord, som han sette då det vart NM-bronse på Fana hausten 2020. Han tok då over trenar Arne Risa sin mosegrodde krinsrekord på distansen.

– Nivået i Noreg er høgt for tida. Det held neppe berre å ta kravet om alle held seg skadefrie. Mitt mål er å koma ned mot, og helst under, 28 minutt. Det trur eg ikkje det er så mange norske som klarar å straffa, seier Gular-løparen.

Tøff oppgåve

Mykje kan tyda på at det vert Lillefosse og Henrik Ingebrigtsen som kan koma til å kjempa om den tredje og siste plassen på 10.000 meter i meisterskapen i Bayern.

– Det er langt fram. Eg har sprunge fleire internasjonale meisterskapar innandørs. I sommar er målet å få debuten ute, seier Lillefosse.

Etter litt skadeproblem tidleg på 2020 sesongen losna det veldig på hausten. Då han presterte 28.23 på Fana stadion, kunne det kanskje vore mogeleg å springa endå fortare.

– Eg avslutta 2020-sesongen veldig bra med bronsemedaljar både på 5.000 og 10.000 meter i NM. I fjor starta sesongen inne glimrande, men skadar gjorde at banesesongen ikkje på nokon måte vart det eg hadde håpa. Heldigvis tok det seg opp då terrengløpa starta seint på hausten, seier Lillefosse, som då tok tre av tre mogelege NM-gull.

– Det viste at kapasiteten var der. Skadane gjorde diverre at eg kom for seint i form til å prestera maks og få skikkeleg gode tider på bane, konstaterer han.

Vil prøve hinder?

Nivået både på 5.000 og 10.000 meter i Noreg er rekordhøgt for tida.

– Det er mange aktuelle kandidatar til plass mellom dei tre som får springa dei internasjonale meisterskapane denne sesongen. Skulle det koma endå fleire, og eg ser at det ikkje går å kvalifisera seg til dei to lengste løpa, vil eg vurdera å prøva 3.000 meter hinder. Det har eg lita erfaring med, men som siste utveg for å få min EM-debut kan det verta vurdert, seier kvemmingen.

Glimrande sesongavslutning

Lillefosse hadde ein god start på 2021-sesongen, der han mellom anna debuterte internasjonalt i EM innandørs i Polen i mars.

– Våren og sommaren vart dessverre delvis øydelagde av skadar og sjukdom. Hausten gjekk betre, og i avslutninga blei det riktig så bra, samanfattar han.

I hovud-NM vart det to 4.-plassar, mot to bronsemedaljar året før.

– På bane gjekk det ikkje så bra i fjor, men terrengsesongen var glimrande, seier han.

Her vann han NM både i og kort og lang løype seinhaustes. Det vart også NM-gull for lag med Gular. I nordisk blei det sølv både individuelt og for lag. I EM i Irland i desember blei det 21.-plass som nest beste norske etter Jakob Ingebrigtsen. Han var dessutan på laget som tok EM-bronse.