Draumehelg for Bjørke
Jonas Bjørke frå Strandebarm vart dobbelt vestlandsmeister i Sogn.
Lokale skyttarar gjorde det godt då Hafslo og Leikanger Skyttarlag skipa til Vestlandsstemnet 1. og 2. juli. Stemnet hadde både baneskyting og feltskyting på programmet.
Skyttarane skaut feltskyting på Leikanger. Der var Bjørke suveren i den innleiande skytinga, med 27 av 30 innertreff. I finalen hadde både Bjørke og Jakob Aardalsbrekke frå Eidsbygda 12 treff og 9 innertreff. Det måtte såleis ei omskyting til før Bjørke kunne smykka seg med meistertittelen.
Også Olav Ludvig Håbrekke frå Strandebarm gjorde det godt. Han vann feltskytinga i klasse 2 og vart meister med 35 treff.
Under baneskytinga på Hafslo skaut Bjørke til fullt hus og 350 poeng. Det var 4 poeng betre enn andreplassen som gjekk til Sara-Sofie Hegg frå Lærdal.
Nesten like stor margin til 2.-plassen hadde Liv Sollesnes frå Jondal skyttarlag. Med 347 poeng hadde ho 3 poeng ned til Elisabeth Leganger frå Holsen, som tok 2.-plassen. Sollesnes vart dimed vestlandsmeister for 7. gong, og for 23. gong var ho beste kvinne.
Sverre Måkestad vart nummer 2 i klasse V65 på baneskytinga.
Jonas Bjørke krona helga med å bli beste lokale i begge hurtigøvingane og tok ein fjerdeplass både i stangskyting og felthurtigskyting, på folkemunne kalla «Stupar».
HF gjer merksam på at journalisten er medlem i Hardanger Skyttarlag, men ikkje deltakar i tevlinga. Red.
