— Dette har me venta lenge på

Laurdag starta over 50 ungdommar skyttarvåren i Hardanger.

Laurdag møtte 54 ungdommar opp til 1. mai-stemne i Vangdalsåsen. Etter at fjorårets stemne vart avlyst på grunn av koronaviruset, valde Hardanger skyttarlag og Jondal skyttarlag i år å arrangera det tradisjonelle 1. mai-stemnet for ungdommar. Retningslinene slår nemleg fast at dei under 20 kan tevla innanfor krinsen sin.

Vegard Eide Aase synest det er kjekt å få konkurrera igjen.

— Eg har sakna det litt. Det er kjekt og sosialt med stemne. Det er kjekt med litt konkurranse og at det kjem fleire folk enn på trening, seier han.

Sjølv om ting er litt annleis på grunn av restriksjonane, synest han ikkje det gjer så mykje.

— Det er absolutt kjekkare med stemne med restriksjonar enn med ingen stemne, seier han.

Fleire ventar

Arve E. Kolltveit, leiar i Hardanger skyttarlag, synest det er kjekt å få komma i gang att etter mykje uvisse. Han fortel at det var jondølingane som tok initiativ til stemnet.

— Stemnet har gått på skjener. Det er litt uvant med restriksjonane, men skyttarane tilpassar seg, seier han.

Det er første gong laget har arrangert eit reint ungdomsstemne. Til vanleg kan over 200 deltakarar stå på listene når ein samlast til stemne i Vangdalsåsen, men Kolltveit er nøgd med stor oppslutnad blant ungdommane. Særleg gler han seg over at fleire nybyrjarar deltok.

— No ventar me på at det skal opna meir, så seniorar og veteranar får delta igjen. Eg veit at det er mange som klør etter å komma tilbake, seier han.

I fjor sommar vart det letta litt på restriksjonane, så skyttarane har fått konkurrert litt det siste året. Mellom anna har hardingane gjort det godt i Hallingdal og Sogn. Men dette er det første stemnet som vert arrangert i Vangdalsåsen sidan pandemien kom til landet.

Venta lenge

Liv Sollesnes i Jondal skyttarlag synest det er kjempekjekt å arrangera 1. mai-stemne igjen. Ho viser til at arrangementet har røter tilbake til 70-talet.

— Dette har me venta lenge på. Endeleg får ungdommane lov til å konkurrera. Det kriblar litt, seier ho.

Ho synest det er lurt å kombinera stemna i Jondal og Vangdalsåsen. Då får deltakarane skyta på to stemne, samstundes som ein avgrensar reisinga.

— I og med at det er tidleg på året, er det første spretten for mange. Det gjer det ekstra spanande, seier Sollesnes.

Sollesnes fortel at laget har forsøkt å halda hjula i gang gjennom pandemien trass i restriksjonane.

— Det har gått fint, men det vert ikkje den same aktiviteten. Utan stemne å trena mot, kan det vera vanskeleg. Særleg dei yngre vert motiverte av konkurransar. Det gjeld nok mange aktivitetar, seier ho.

43 deltakarar skaut i Jondal. I tillegg til lokale ungdommar kom skyttarar frå Kvinnherad, Voss, Haugesund og Stord.