– Dette har eg gledd meg til
Mathias Dahl Ellingsen (33) har spela for herrelaget til Norheimsund i ei årrekkje. No ser han fram til ein ny sesong som ein del av samarbeidslaget Øystese/Norheimsund.
– Hadde det ikkje vore for samarbeidet, hadde eg nok lagt opp før denne sesongen. Eg har lyst til å slutta med fotball medan kroppen framleis fungerer, men for meg og mange av mine jamaldrande har eit samarbeid på seniornivå vore etterlengta. Når noko ein har ønskt seg, endeleg skjer, ville det vore for dumt å gje seg. Eg vert i alle fall med fram til sommaren, fortel han.
Ellingsen, som spelar sentralt på midtbanen, fortel at han har spela fotball i Bergen og Sogn i tillegg til i Norheimsund. Han har spela i alle divisjonar mellom 3. og 7. divisjon. Det er nokre år sidan sist han spela i 4. divisjon. Sidan det fysiske nivået er litt høgare, har han lagt inn litt ekstra eigentrening for å vera førebudd på det som ventar.
– Vanskeleg oppkøyring
Øystese/Norheimsund spelar i 4. divisjon avdeling 1. Serien startar fredag 14. april, då Osterøy vitjar kunstgrasbanen i Øystese. Sjølv om førebuinga til sesongen starta allereie i november, fortel Ellingsen at oppkøyringa langt frå har vore optimal. Hovudårsaka er vêret.
– Kulde og snø har gjort at me har fått lite tid på stor bane. Treningskampar har vorte avlyste og treningane har vorte flytta inn i Framnes Arena. Når eit nytt lag skal verta samspela, er det lurt å trena på stor bane, seier han.
Troppen til Øystese/Norheimsund består av ei blanding av spelarar frå Norheimsund og Øystese, og elevar ved Framnes Kristne Vidaregåande skule.
– Dei lokale laga har slite med at dei har hatt mange spelarar som anten er under 20 år eller over 30 år, men få spelarar i 20-åra. Slik er det til ein viss grad framleis. Når det gjeld kondisjon, trur eg me ligg godt an. Ungdomane spring som berre det, og me har mange godt trena spelarar. Men i 4. divisjon kjem me nok til å møta ein del fysisk tøffe lag, seier Ellingsen.
Han tykkjer likevel at laget har sett brukbart ut i dei treningskampane som er spela.
– Me har møtt fleire andre 4.-divisjonslag og det har gått rimeleg bra. Hovudtrenar Denis Ljubovic er flink. Han gjev tydelege beskjedar, og det verkar som om spelargruppa skjønar korleis han vil ha det. Eg tykkjer det ser lovande ut, seier Ellingsen.
– Eit spelande lag
Ljubovic, som kjem frå Kroatia, fortel han at hans fotballfilosofi handlar om å halda ballen langs bakken.
– Eg ønskjer at Øystese/Norheimsund skal prøva å spela fotball i staden for å berre satsa på lange ballar og duellar. Eg trur spel langs bakken er det kjekkaste for spelarane. Samstundes skal me ikkje berre ha det kjekt, me skal også vinna kampar og ta poeng, seier han.
Han er usikker på kor godt det offensive spelet vil fungera i dei første kampane.
– Ein treng å trena på stor bane for å få det offensive grunnspelet til å sitja. Defensivt trur eg me er godt nok førebudde, men det kan henda me treng nokre kampar før det offensive sit, seier han.
Ljubovic ønskjer å spela i formasjonane 4-3-3 eller 4-2-3-1.
– Men dersom eg ikkje føler me har lag til å spela slik, må me kanskje prøva andre formasjonar, seier han.
– Vil unngå nedrykk
Ellingsen meiner det naturlege sesongmålet må vera å unngå nedrykk.
– Dette er eit heilt nytt lag, og det er vanskeleg å seia korleis me ligg an samanlikna med motstandarane. Me kjem til å møta mange gode lag, og det skal verta artig å måla krefter mot dei. Eg trur me skal vera nøgde om me unngår nedrykk, seier han.
Dei to fotballklubbane ønskjer at både A-laget Øystese/Norheimsund og B-laget Norheimsund/Øystese 2 skal variera mellom å spela kampar i Norheimsund og Øystese. Enno er det usikkert om fotballkrinsen tillèt dette. Uansett kvar laga spelar, oppmodar Ellingsen publikum frå begge bygdene om å gå på kamp.
– Eg tykkjer dette samarbeidet er veldig kjekt. Eg håpar det fører til stort engasjement i begge bygdene, seier han.
