Det vert éin heimebane

Det stadfestar Torstein Pedersen i Norges Fotballforbund i ein e-post til fotballklubbane. Ynsket om å spela heimekampar i begge bygdene vert dimed ikkje innfridd. A-lagskampane skal spelast i Øystese, og B-lagkampane skal spelast i Norheimsund.

NFF meiner ei veksling av heimebanar hadde gjeve motstandarane svært ulike konkurransevilkår, spesielt sidan det er stor skilnad på banestorleiken.

– Derfor kan me ikkje godkjenna søknaden med tanke på at laga på dette nivået spelar om opprykk til nasjonalt nivå (Norsk Tipping-ligaen). Dette vart det også informert om på terminlistemøtet for 4. divisjon menn, og det var full semje der om avgjerda, skriv Pedersen.

Styreleiar i Norheimsund Fotballklubb, Erlend Ellingsen, seier til HF at avgjersla ikkje vil øydeleggja noko, sjølv om laga hadde håpa på eit anna svar.

– Me har kome godt i gang og har vorte ein stor og samansveisa gjeng. Me er optimistiske og må halda oss til svaret. Så får me sjå korleis det vert til neste år, seier Ellingsen.

Bakgrunnen for at klubbane ville byta på heimebanane, var mellom anna at det skulle vera begge bygdene sitt prosjekt, opplyser styreleiaren. No vert det slik at dei som spela i 4. divisjon i Øystese, framleis spelar i Øystese, og at dei som spela i 5. divisjon i Norheimsund, framleis spelar i Norheimsund, fortel han.

– Vil dette påverka publikumstalet?

– Nei, det trur eg ikkje. Det var god oppslutning i bygdene då opningskampane, som starta samstundes, vart spela. Så det trur eg vil gå fint, seier Ellingsen.

Det er mykje positivitet og entusiasme, fortel han. Sjølv med ein tøff start trur Ellingsen at folk har sansen for å sjå på fotball og likar å sjå spelarar som dei kjenner til. At kampane krasjar, skal ikkje skje igjen, påpeikar han.