– Det var godt å kjenna at kneet fungerte
For eitt år sidan gjorde ein alvorleg skade at Christian Kjosås måtte leggja fotballskoa på hylla. I år var han blant dei raskaste i Norheimsund–Voss.
– Etter skaden sa eg til kirurgane at eg skulle verta klar til Bergen–Voss til neste år. Det trudde dei ikkje på. No klarte eg i alle fall å sykla den korte distansen, fortel Kjosås.
Det var ingenting å seia på farten. Han sykla det 78 kilometer lange rittet på 2.28.30. Det heldt til ein delt 2.-plass i herreklassen Han kom 23.20 minutt bak vinnaren, Bjørn Christian Larsen frå Bergen Cykleklubb.
– Støtta kvarandre
Kjosås delte 2.-plassen med kompisen Heine Buene. Dei to passerte målstreken samstundes.
– Me hjelpte kvarandre heile vegen. Når eg hadde det vanskeleg, hjelpte han meg og motsett. Det vart ingen sluttspurt. Me sykla for å ha det kjekt, fortel Kjosås.
Han har sykla Bergen–Voss fleire gonger. Dette var første gong han sykla Norheimsund–Voss.
Det skadde kneet fungerte ifølgje Kjosås overraskande bra.
– Berre opp Skjervet gjorde det litt vondt. Eg hadde førebudd meg godt og har fått i alle fall 30 til 40 prosent av muskelkrafta att i venstrefoten. Eg hadde vore nøgd berre med å fullføra. Å få ei såpass sterk tid gjer meg svært nøgd, fortel han.
Den som undersøkjer resultatlistene frå Norheimsund–Voss, vil ikkje finna Buene. Årsaka er at han starta med eit startnummer registrert på skiskyttartalent Hedda Høen Mo, som ikkje kunne starta på grunn av sjukdom. Buene si tid står difor oppført som vinnartida i kvinneklassen.
Skiskyttar sykla fort
Den eigentlege vinnaren i kvinneklassen var Andrea Sørheim Almeland, ein annan lovande skiskyttar. Ho sykla frå Norheimsund til Voss på 3.11.51. Almeland sykla i klassen K16–19 og representerte Kvam Langrenn- og Skiskyttarklubb.
Robert Lund frå Norheimsund fekk den 3. raskast tida i Norheimsund–Voss. Han fullførte på 2.35.15.
John M. Tveit, som sykla i klassen M75–79, kom i mål med tida 3.23.28. Det var den 8. raskaste tida i herreklassen.
6 syklistar frå Hardanger Sykkelklubb fullførte det 162 kilometer lange rittet Bergen–Voss. Raskast av dei var Stig Byrkjeland, som brukte 4.27.02. Det var godt nok til ein 85.-plass i herreklassen. Morten Jakobsen kom på 95.-plass med tida 4.27.48. Den 3. raskaste kvemmingen var Ivar Tveiten, som sykla i klassen M70–74. Hans tid vart 5.05.31.
Som vanleg var det såkalla timeout i Norheimsund, men denne gongen ikkje ved skulen. Anleggsarbeidet der førte til at pausen og serveringa av mat og drikke, som Kvam Langrenn- og Skiskyttarklubb som vanleg stod for, vart flytta til brannstasjonen på Mo.
