– Det går seg alltid til

Skigruppa i Strandebarm Idrettslag nyttar vêret og skipar til sitt andre skiarrangement allereie fredag. Måndag er det klart for sesongopning for serierenn på Sjusete, etter at det fyrste rennet måtte utsetjast på grunn av vind. Neste fredag går sesongens fyrste skirenn på Storemyr i Jondal.

Jan Tore Uglehus Tveit, styreleiar i Sjusete Skisenter, fortel at det ikkje er noko nytt å melda i år. Både maskineriet og løypenettet er som i fjor, og fungerer bra, seier han. Skiløypene har ein god sole i botnen som gjev eit bra underlag. Sjølv om det er litt lite snø i Kjosåsløypa og i løypa til Alkleiv, er lysløypa bra, ifylgje Tveit.

– Lysløypa skal me klara å halda om det ikkje kjem sju plussgrader og regn. Me toler nokre plussgrader, men om det regnar i meir enn to–tre dagar, slit me, seier Tveit.

Om lag 100 påmelde

Han forklarer at bekkar og elvar framleis er opne, og at han er redd vatnet vil vaska vekk løypetraseen om det kjem mykje regn. Silje Laupsa Mo, leiar i Kvam Langrenn- og Skiskyttarklubb, seier det fyrste serierennet for skiskyttarane er utsett til slutten av sesongen. Eigentleg skulle rennet blitt arrangert måndag denne veka, men vinden hindra det.

– Eg var på Sjusete måndag, og det var omtrent som å køyra over Hardangervidda. Det skal alltid vera sikkert når me driv med skyting. Med vind opp i 20 meter i sekundet var det ikkje forsvarleg å arrangera renn, seier Mo.

Tysdag vart den fyrste skitreninga arrangert. Torsdag venta Mo fullt trykk på Sjusete med både trening og oppstart av skileik der om lag 100 born er påmelde.

– Vil ha med fleire

Måndag møter langrennsløparane til årets fyrste serierenn. I år fokuserer skiklubben på den opne klassen der kven som helst kan delta uansett nivå. Klassen er ikkje ny, men arrangøren ynskjer fleire deltakarar til å gå den 1,7 kilometer lange løypa. Spesielt håpar ho ungdomar og folk som har gått på ski tidlegare, får lyst til å gå renn att.

– 12-åringar som synest tre kilometer er for langt, kan melda seg på i open klasse. Folk i 40-årskrisa som ikkje er i form til å gå fem kilometer kan òg delta. Eller du kan vera med om du har budd i Sandnes og ikkje har gått så masse på ski, seier Mo.

Ifylgje Mo er målet å spreia skiglede og kosa seg på ski. Ho vonar mange nyttar anlegget. Då er det fint at folk har ski på beina, og ikkje sko, seier ho. For å rekruttera til klassen har laget fått med Malin Auganæs Bergtun, Hanna Børve og fysioterapeut Torild Kveberg i ein reklamefilm i sosiale medium, sjølv om også jungeltelegrafen fungerer.

– Dessutan kan du sjå meg i skidress, og det skjer ikkje ofte. Det er viktig å «bjuda» på for ei god sak, seier Mo og ler.

– Gjer det for ungane

Mo fortel at dei yngste ser opp til juniorar og seniorar. Det merkast på oppmøtet når skiskyttar Hanna Børve er på Sjusete. Ho er eit trekkplaster for klubben, seier Mo.

Som tidlegare år vert det mykje dugnad. Ifylgje Mo er klubben avhengig av frivillig arbeid og prøver å fordela byrda, men det er ein gjeng som deltek på veldig mykje dugnad.

– Me gjer det for ungane våre. Sjølv har eg eit barn som går på skiskyting, og då må foreldre alltid vera med. Men me vert godt kjende av å gå rundt og frysa på skytebana, seier Mo.

Ho seier det er godt for folkehelsa å gå på ski, og oppmodar foreldre til å ta seg ein runde i løypa medan borna er på trening.

– Dei vaksne kan også vera med borna på trening eller skileik. Kanskje dei òg kan læra nokre triks, seier Mo.

– Få reiser

I tillegg til fire serierenn i skiskyting og fem i langrenn, skal klubben arrangera Torefjellsrennet, Kvammasprinten og to krinsrenn i skiskyting. I det siste serierennet skal kvammameistrane kårast blant deltakarane frå 13 år og oppover. For skiskyttarane vert det også delt ut ein skytepokal til den av klassevinnarane i det siste rennet som har skote best. Skytepokalen er ein vandrepokal som må vinnast tre gonger før skiskyttaren får han til odel og eige, fortel Mo.

Det er, ifylgje Mo, altfor få skiløparar frå klubben som reiser for å gå renn. Men det er skiskyttarane som er mest engasjerte. Ho seier at det på planen deira står mellom anna renn på Røros, Geilo, Ål og i Holmenkollen, i tillegg til Voss, Odda og Hålandsdalen. Mo ynskjer seg fleire aktive langrennsløparar i klubben.

– I helga var fem av seks deltakarar i langrennsstafetten skiskyttarar. Då må nokre av dei gå i klassisk stil, noko dei ikkje plar gjera. Det gav meirsmak, og nokre av dei skal delta i klassisk i Samnangerrennet på laurdag, seier Mo.

Ho ser fram til det vanlege kaoset som oppstår under det fyrste serierennet.

– Me «moskar» på slik me er vane med, men det er alltid utfordrande når ting er nye. Det lærte me i fjor, og året før. Men i år er me sikkert kjempegode på å arrangera allereie frå det fyrste rennet, seier Mo.

– Ikkje like profesjonelt

Som ein del av Telenorkarusellen arrangerer skigruppa i Strandebarm til hovudlykttur fredag. Torunn Lutro, leiar i skigruppa, seier at gruppa nyttar sjansen så lenge snøen er her. Turen går frå Åse og om lag ein kilometer inn i skogen, slik at folk i alle aldrar kan vera med. I skogen er det ei sløyfe til å gå på ski, og borna får leika i snøen. Borna får premiar. Seinare i sesongen håpar Lutro det vert forhold til å arrangera både Sneldevatnet rundt og andre skirenn. Dei som ikkje har ski og stavar, kan låna.

– Det er ikkje like profesjonelt hjå oss som på Sjusete. Me har eit litt anna opplegg, med eit lågterskeltilbod der me håpar flest mogleg blir med, seier Lutro.

– Skal vera moro

Stein Olav Ness i skigruppa til Jondal Idrettslag seier gruppa har to arrangement kvar veke. Måndagane er det fellestrening, og på fredagskveldane er det renn. Det fyrste rennet startar neste veke, om alt går etter planen.

– Me fekk køyrt trakkemaskina gjennom løypa og fekk komprimert snøen før det byrja å blåsa, så eg trur me har klart å halda på snøen. No er det plutseleg grøne bakkar igjen, og det er skrint med snø i fjellet. Men me er positive, for det går seg alltid til, seier Ness.

Han seier at gruppa har sett opp ein reservedag, i tilfelle det fyrste rennet må utsetjast. Renna plar koma i gang seinast i siste halvdel av januar, og Ness seier han vel å stola på vêrstatistikken. Dei siste to serierenna går på søndagar, og plar ha mykje publikum, ifylgje Ness.

I tillegg til dei fem lysløyperenna skal laget skipa til lagsmeisterskap og som vanleg avslutta sesongen med Olastølsrennet.

– Me nyttar den gode, gamle oppskrifta me veit fungerer. Som i fjor gjer foreldre alt på dugnad, seier Ness.

Det kostar ingenting å delta på renna. Idrettslaget spanderer kaffi, saft og vaflar, og har utstyr å låna vekk om nokon treng. Ness fortel at det vanlegvis er rundt 30 deltakarar på renna, nokre gongar ned mot 20 og andre gongar opp mot 40. Det er flest i 10–11-årsalderen, og så går det nedover, ifylgje Ness.

– Mange gjev seg litt tidleg. Det skal berre vera moro, seier han.