Debuterte i drygt løp

– Det gav meirsmak, seier Sveinung Soldal.

Det var fyrste gong Soldal stilte til start i eit så langt løp. Tidlegare har han prøvt seg på nokre halvmaratonar på asfalt. Dette var annleis.

– Kva fekk deg til å melda deg på?

– Det er eit godt spørsmål. Det har vel sikkert litt å gjera med miljøet eg har hamna i, seier debutanten.

Soldal har trena nokre år, så det var ei slags naturleg utvikling å setja eit nytt mål. Fram til løpet prøvde han å auka treningsmengda. Han har hatt fleire langturar i fjellet.

– Korleis var det?

– Knallhardt. Det var vått, myrete og, ja, løypa saug kreftene ut av meg. Eg måtte jobba med meg sjølv, seier sprekingen, som kom i mål etter 6 timar og 16 minutt.

Undervegs lura han på kva i alle dagar han heldt på med, men dagen etter tok han seg sjølv i å sjå etter fleire løp.

– Tøffe forhold

Trongen for nye utfordringar er truleg attkjenneleg for Terje Bekkesletten. Han gjorde det best av dei lokale utøvarane. Bekkesletten, som var med for 7. gong, sprang seg inn på ein 6.-plass med tida 4.45,48. Det var 38 minutt bak vinnaren, Steffen Brufladt frå Romerike Ultraløperklubb.

Bekkesletten er nøgd med årets løp, og seier at det truleg er det best gjennomførte løpet han har hatt på Hardangervidda med tanke på forholda. Til liks med Soldal nemner han ei svært blaut løype.

– Det har aldri vore så tøffe forhold før. Berre nokre få parti var tørre. Til vanleg er det motsett. Det førte til problem med feste og mange fall, fortel utøvaren.

Utanom det var vêret perfekt. Litt overskya tidleg på dag, og fantastisk vêr på slutten av løpet. Draumeforhold, meiner Bekkesletten.

– Ei naturoppleving

Av vel 500 påmelde fullførte kring 450. 145 av dei sprang maraton, resten halvmaraton.

Løpet har start ved Høl og mål på Liseth, og utfordrar deltakarane med ein nokså uvanleg løypeprofil. Arrangøren skildrar løypa som hard, brutal og heilt nydeleg. Ein får både fjellvidder og klatreetappar, og naturen er ein stor del av opplevinga.

Neste «stopp» for kompisgjengen til Bekkesletten er maraton i Valencia 1. desember. Sjølv står han på venteliste, og er førebels utan billett.

– Elles vert det sikkert nokre mindre løp, men ikkje noko større. Eller – ein skal aldri seia aldri, seier Bekkesletten.