Byter skiløparar ut med hestar

Drivenes, som kjem frå Tørvikbygd, men bur i Olsvik, er tilsett som ny dagleg leiar i Bergens Traverbane AS, selskapet som driv Bergen Travpark, skriv verksemda i ei pressemelding.

Drivenes er for mange mest kjend som skitrenar. Han har trena både langrennslandslaget til Sveits, damelaget til Tyskland og det norske rekrutteringslandslaget.

– Det er eit langt steg frå langrenn til trav?

– Det er eg samd i, men samstundes er det mykje likt. Til sjuande og sist handlar det om å skapa resultat. Det handlar om å setja seg mål og jobba målretta mot dei. Verktøya er kanskje ulike i ein travpark, men systematikken er den same.

Drivenes er ikkje heilt utan erfaring frå næringslivet. Han har vore dagleg leiar for Sats på Lillehammer og har dessutan utdanning innan organisasjon og leiing.

– Mindre reising

Jobben i skiforbundet hadde Drivenes fram til juni. Familiesituasjonen var årsaka til at slutta.

– Skitrenarjobben var ein jobb med svært mykje reising. Det var krevjande å få dagane til å gå opp når ein har to born og ein sambuar i full jobb. Det vert mykje mindre reising i denne nye jobben, seier han.

Drivenes seier at han alltid har vore interessert i travsport og at han har vore medeigar i fleire hestar.

– Det er mykje som fasinerer med meg travsporten. Sporten har vore inne i ein negativ trend dei siste åra. Eg vert trigga av utfordringar og trur Bergen Travpark har eit stort potensial eg håpar eg kan bidra til å henta ut, seier han.

– Kva vert hovudoppgåvene?

– Det får me sjå litt på. Først må eg setja meg inn i stillinga og sjå litt på kva som er bra og kva som treng forbetring. Mykje kjem nok til å handla om å skaffa meir inntekter til travparken, seier han.

Friskt blikk

Drivenes trur det er ein fordel at han ikkje har vore for djupt inne i travmiljøet.

– Eg har litt kunnskap om hestesport, samstundes som eg ikkje har vore så tett på miljøet at eg har vorte prega av det. Eg trur styret ønskte ein leiar som kjem inn med eit friskt blikk, seier han.

Drivenes veit ikkje kor mange andre som hadde søkt på stillinga, men han fortel at søknadsprosessen var lang og grundig.

– Eg trur me var gjennom fire rundar, der målet var å gje styret innsikt i kva eg tenkjer om fortida, notida og framtida til travsporten, seier han.

Drivenes hadde første arbeidsdag måndag 16. januar.