– Bra utvikling for dei fleste
Fleire unge talent gjorde det godt då skiskyttarsesongen – i alle fall på heimebane – vart avslutta i helga.
Både laurdag og sundag var det fart i spora og aktivitet på standplass på Sjusete. Kvam Langrenn- og Skiskyttarklubb (Kvam LSK) arrangerte dei to siste renna i New Boliden Green Zink Cup.
Ifylgje Gerd Ingrid Dukstad Norheim, som er ansvarleg for skiskyttarane i Kvam LSK, gjekk renna fint føre seg. Over 80 deltakarar stilte til start begge dagane. Ungane kosa seg, fortel ho. Kanskje litt meir i solstrålane laurdag enn i regnvêret sundag.
– Betydeleg større
Ifylgje Norheim har det jamt over vore ein fin og stabil sesong med mykje snø. Det er god aktivitet i skiskyttargruppa, som har mange aktive deltakarar.
– Når me reiser, er me eitt av dei største laga – i alle fall betydeleg større enn me har vore tidlegare, seier Norheim.
Og det er ein sosial gjeng som er på turar, fortel ho. Den neste og siste reisa denne sesongen går til Ål og Liatoppen. Der vert Liatoppen skiskyttarfestival arrangert i midten av april. Kring tjue deltakarar frå Kvam LSK er påmelde.
Fleire pallplassar
Laurdag kom Andrea Sørheim Almeland best ut i klassen K17. På 2.-plass kom Hedda Høen Mo. Ronja Måkestad, som vann sin klasse i cuprennet i Odda førre helg, enda på ein 2.-plass i J13 laurdag. Den plassen fekk ho også samanlagt i cupen. I J12 enda Perle Nygård på 3.-plass laurdag.
Jørgen Måkestad tok 1.-plassen i klassen G11, og i klassen for G12 fekk Balthasar Möller ein 2.-plass. 9 av dei 23 startande i klassen for nybyrjarar og yngre var kvemmingar. Klassen har ikkje plasseringar.
Philomene Möller deltok ikkje i helga, men kom likevel på ein 2.-plass samanlagt i klassen for J14.
Lokale førebilete
Norheim trekkjer fram eit godt trenarteam og gode førebilete i klubben.
– Ungane ser veldig opp til Hanna Børve og Malin Auganæs Bergtun. Dei fylgjer med! Og så har me eit godt trenarteam no. Det gjer det kjekt å delta og aukar lysta, seier ho.
Trenar Åsne Ulvund seier at dei fleste utøvarane har hatt god utvikling denne sesongen. både i sporet og på standplass. Det har vore bra med folk, og det verkar som dei er motiverte og har det kjekt på renn, seier ho.
