– Børve imponerer
Hanna Børve frå Øystese tok 2.-plassen i rulleskiskyting i klassen for 20–22 år gamle kvinner på Blinkfestivalen i Sandnes i helga.
Ho går for Kvam Langrenn- og Skiskyttarklubb. I den innleiande runden i Vågen i Sandnes fredag vart øystesekvinna nummer 1 med tida 9.35,5 og 2 bomskot.
I finalen laurdag kom ho på 2.-plass og gjekk på tida 9.27,1, berre 13,4 sekund etter vinnar Maren Hjelmeseth Kirkeeide frå Markane IL. Børve fekk 3 strafferundar laurdag. Kirkeeide hadde 2 bommar den dagen.
Andrea Sørheim Almeland frå Kvam gjekk i aldersklassen kvinner 17 år. Ho tok 3.-plassen i finalen med tida 11.08,8. Ho kom i mål 1 minutt etter vinnar Julie Tronerud Kvelvane frå Voss IL. Almeland bomma 3 gonger.
Det var fleire unge med frå Kvam. Fleire av dei yngste gjekk langrenn.
– Det er bra at det gror litt etter meg, konstaterer Børve.
– Nøgd med løpa
Ho seier at løpa gjekk fint.
– Eg var litt spent før Blinkfestivalen. Eg hadde trena åleine heile sommaren og visste ikkje heilt kvar eg stod, men eg er nøgd med båe løpa. Eg var litt irritert på meg sjølv for at eg fekk to bommar på slutten av laurdagen. Eg leia jo fram til det, seier Børve.
– Korleis var forma?
– Eg føler treningsforma er bra, men eg hadde ikkje toppa forma til desse løpa. Det er framleis lenge til vinteren, så eg håpar eg har mykje å gå på, seier ho.
Blinkfestivalen starta onsdag i førre veke med Lysebotn opp. Då var det 8 påmelde og 7 som gjennomførte frå Kvam. Børve gjekk heile Lysebotn opp, 7,5 kilometer, – «mest for treninga sin del», som ho seier. 2 frå Kvam gjekk 1 kilometer og 4 løparar fullførte 2 kilometer.
Jakob Aarekol Botnen, Johan Aarekol Botnen, Synneva Laupsa Mo, Torje Laupsa Mo, Asbjørn Norheim og Sigrid Norheim frå Kvam deltok. Andrea Sørheim Almeland tok 2.-plassen i 17-års-klassen.
Løp for store og små
Torsdag var det eliteløp. Fredag var aldersbestemte grupper i elden. Alle klassar frå 2012 og oppover hadde prolog, kvartfinalar, semifinalar og finalar.
I prologen i langrenn for jenter fødde i 2011–2012 fredag deltok Synneva Laupsa Mo og Sigrid Norheim. Dei kom til semifinalane laurdag.
Laurdag var det fellesstart i langrenn for dei minste. Der gjekk Kaja Høen Mo i 2014-klassen og Asbjørn Norheim i 2013-klassen.
8 løparar deltok i løpa fredag og laurdag i Sandnes, opplyser skiskyttarforelder Gerd Ingrid Dukstad Norheim.
Andrea Sørheim Almeland, Hedda Høen Mo, Synneva Laupsa Mo, Torje Laupsa Mo, Asbjørn Norheim og Sigrid Norheim deltok i den innleiande runden fredag.
Fredag kom Torje Laupsa Mo på 24.-plass i skiskyting i klassen gutar 15–16 år.
– Ein folkefest
Gerd Ingrid Dukstad Norheim seier det var kjekt å fylgja løparane til Sandnes.
– Det er ein folkefest utan sidestykke, og veldig kjekt for borna. Dei har sterkt samhald. Dei heiar på kvarandre på tvers av aldersgrenser og leikar mellom løpa. Når me driv med skiskyting, så er me føresette mykje med, og det gjev seg utslag i at me blir ein god gjeng som er kjekk å vera i lag med, seier ho.
Klubbleiar Silje Laupsa Mo seier at seks familiar reiste i lag til Sandnes.
Ho seier Hanna Børve hadde med seg teamet sitt og far, mor og ein bror i støtteapparatet, pluss alle andre frå Kvam som heiar på henne.
– Det er alltid like kjekt å vera med på Blinkfestivalen, seier Mo.
– Det er liv og røre, tidleg opp og lange dagar. Fyrst går våre eigne utøvarar, og så heiar me på storsusarane om kvelden. Det er stas å få helsa på dei profesjonelle. 15- og 16-åringane frå heile landet vart inviterte til ei spontan Mot-samling på eit hotell ein halvtimes tid saman med Sturla Holm Lægreid, Johannes Thingnes Bø og Ingrid Landmark Tandrevold, seier Mo.
Tilbake til kvardagen
På Facebook-sida si skriv Børve at ho og fleire yngre utøvarar frå Kvam fekk kjenna på konkurransenervane igjen.
– Eg tek med meg ein 1.-plass, ein 2.-plass og gode svar vidare i treningsarbeidet inn mot skisesongen, skriv ho.
Blinkfestivalen rundar av ein god treningssommar for Børve, der ho har fått viktige treningstimar til fjells, på asfalt og på snø.
– No vender eg snuten austover mot Lillehammer, tilbake til «kvardagen» og trening med laget mitt, skriv ho.
Team Mesterbakeren skriv på Facebook at Børve imponerer mellom juniorane med resultata i Sandnes.
