Børve braut NM-renn

Øystesejenta, som representerer Kvam Langrenn- og Skiskyttarklubb og Team Fosen Yard, trefte berre med halvparten av dei 10 sprintskota i noregsmeisterskapen for seniorar fredag. Det førte henne 4.48,1 minutt bak vinnar Juni Arnekleiv frå Dombås.

Børve gjekk så raskt i sporet at ho hadde kome monaleg høgare på lista med nokre færre bomskot. Andrea Sørheim Almeland, også ho frå Kvam, kom på 105.-plass med berre 2 bomskot. 148 starta.

Fellesstarten laurdag byrja for så vidt bra, men midt i rennet valde Børve å bryta. 23-åringen seier til HF at ho har slite med ryggen heile sesongen. Det er kjedeleg å bryta, tykkjer ho, men ho lyt tenkja langsiktig.

– Eg hadde ikkje fått mykje att for å fullføra, seier skiskyttaren.

Den siste perioden har Børve hatt mindre fokus på konkurranse og meir fokus på å trena den vonde ryggen. Før helga hadde ho hatt ein periode der det meste hadde fungert bra på trening. Konkurransen trigga likevel ryggsmerter, og dei påverka både skytinga og skigåinga, fortel ho.

– Det gjekk eigentleg heilt greitt i starten. Skytinga var veldig bra. Eg hadde kanskje kome meg i mål, men det hadde ikkje vore føremålstenleg, seier Børve.

Sjølv om ikkje sesongen har vorte som ynskt for kvemmingen, gjev ho seg ikkje. Det kjem ein ny sesong, og 23-åringen synest framleis det er kjekt å driva med sporten.

– Eg er veldig motivert for vegen vidare, seier ho.

Marthe Kråkstad Johansen frå Bossmo & Yttern hamna øvst på pallen med berre éin bom og tida 37.50,1 minutt.

Også stafetten sundag gjekk ut for Børve sin del, men Almeland deltok som ein del av Hordaland SSK 2 saman med Ingri Skjelbreid Gjelland og Une Christiane Tronerud Kvelvane. Laget kom på 22.-plass av 29 lag.

Hordaland SSK 1, som bestod av Guro Femsteinevik, Julie Tronerud Kvelvane og Ragnhild Femsteinevik, stakk av med sigeren.