Blanda drops frå Rossvoll
Rossvoll Volleyballklubb gjekk ut av helga med både siger og tap.
Laurdag slo Rossvoll OSI 2 3–0. Kampen vart spela i Framnes Arena i Vikøy. Sundag vart det tap då TIF Viking 2 vann 3–1 i Øystesehallen.
Jon Erlend Haukås er hovudtrenar og lagkaptein for herrelaget. Trass sigeren mot OSI 2 er han langt frå nøgd med kampen.
– OSI 2 kom med eit ganske svekt lag. Det kan vera me undervurderte dei. Samspelet og rytmen stemte ikkje, og det var mykje slurv. Me gjorde det me skulle og vann kampen, men kunne gjort det på eit høgare nivå for å gjera det litt kulare for publikum, seier Haukås.
– Truleg årsbeste
TIF Viking 2 er eit av dei beste laga i divisjonen. I dei to første setta var Rossvoll ifølgje Haukås sjanselause.
– Lite stemte for oss, samstundes som dei var ekstremt gode i blokk. Me kom oss ikkje forbi dei, fortel Haukås.
Før det tredje settet gjorde Rossvoll justeringar. Det gav resultat.
– Det tredje settet må vera mellom dei beste setta me har spela denne sesongen. Me vart smartare både i blokk og angrep. I staden for å slå hardt rett i dei klarte me å slå litt meir rundt dei. Me fann rytme, medan dei byrja stressa, seier Haukås.
Det fjerde og siste settet var lenge jamt.
– Men mot slutten av settet trur eg overtenninga tok oss. Dermed gjorde me dumme feil, slik at TIF Viking kunne avgjera kampen, fortel Haukås.
– Ønskjer ikkje opprykk
Rossvoll byrja sesongen dårleg og sleit ei stund i botnen av 1. divisjon. Etter eit internt oppvaskmøte i januar har ting endra seg. Laget har klatra til 5.-plass på tabellen. Det plasserer Rossvoll i ein litt absurd situasjon. 5.-plass gjev nemleg plass i ei opprykksturnering som vert spela Haugesund i slutten av april. Problemet er berre at klubben ikkje ønskjer opprykk.
– Eliteserien er ikkje klubbyggjande. Det er lettare å utvikla laget og sleppa unge spelarar til i 1. divisjon. Slepper me dei unge til i Eliteserien, kjem me til å få juling i kvar kamp. Eg har skrive brev til forbundet og spurt om me kan sleppa opprykksturneringa. Forbundet plar vera veldig firkanta når det gjeld regelverket, så eg tvilar på om me vert høyrde. Dermed kan me risikera å spela ei turnering me ikkje eigentleg vil vinna, seier Haukås.
Også damelaget til Rossvoll kom frå helga med éin siger og eitt tap i 2. divisjon. Laurdag vann damene 3–0 over Gneist. Sundag vart det eit 1–3-tap mot TIF Viking 2.
Både herrane og kvinnene spelar kamp att laurdag. Herrelaget møter Sandnes VBK, medan damelaget møter BSI 2.
