Bjørn Steine vann Norsk Travderby
Kusken frå Kvam førte varmblodshesten Born in Bergen til siger i det prestisjefylte løpet sundag.
Det hende på Bjerke Travbane i Oslo dagen før han skal byrja som travtrenar på Jarlsberg i Tønsberg. Sigeren vart premiert med 850.000 kroner. I alt har han køyrt inn vel 3,8 millionar kroner på 427 startar i år.
Ifylgje nettstaden trav365.no køyrde Steine offensivt heile vegen og nekta å gje slepp på leiinga, og Born in Bergen hadde nok krefter til å halda konkurrentane unna. Favoritten, Just Perfect Sisu, kom sterkt på slutten, men makta ikkje henta inn kvemmingen. Han avslutta dei 2.600 metrane på 1.14,4.
Steine var kjensleladd etter sigeren.
– Herleg og berre heilt utruleg stort. Eg følte me måtte prøva då me var her og stod i fyrstesporet. Me prøvde og det gjekk heldigvis. Midt i siste sving følte eg me fekk overtaket, og han var motivert. Me klara å halda farten. Han fekk fleire lengder, og dei blei gode å ha. Dette er ei vitamininnsprøyting til eg startar som trenar, sa Steine under seremonien etterpå, ifylgje trav365.no.
– Eg har det godt no. Dette betyr utruleg mykje. Me jobbar og kjempar for å få alt til å gå rundt. Ein derbysiger er det største me kan oppnå, seier trenar Kim Pedersen til nettstaden.
