Biletserie: Tour des Fjords fekk mange ut or kvammastovene
Det var grått og vått, men folksamt då Tour des Fjords skapa liv og røre i Kvam i ettermiddag.
Mykje skrik og lite – eller i alle fall kortvarig – ull er kanskje eit høveleg omgrep for sykkelritt. Rittet førte til timevis med stengde vegar og riggearbeid, medan møtet med sjølve syklistane er over på få minutt.Mange hadde likevel teke turen ut i regnet for å få med seg den kjappe moroa. Folk stilte opp med fargerike parykkar, flagg, plakatar og andre påfunn som kunne føra til merksemd på direktesendt fjernsyn, eller i alle fall frå grannane.Etappen frå Brekke i Gulen til Norheimsund i Kvam var 185 kilometer lang. Dei siste mila vart sykla i Kvam frå syklistane passerte Eikedalen. Etter turen ned Tokagjelet og Steinsdalen sykla dei opp Norheim og over Skålheim til Øystese, før ein ny motbakke venta opp Skårdalen på vegen mot Skårsvatnet og Porsmyr. Så følgde dei hjelmkledde fylkesvegen tilbake til Norheimsund, der det vart ein lang og flat spurt opp Steinsdalen til målstreken ved Steinsdalsfossen.Kven som vann? Det fekk truleg dei færraste med seg der og då. Svaret er Timo Roosen i laget LottoNL-Jumbo, eit lag som dermed slett ikkje levde opp til namnet. Edvald B. Hagen frå Noreg vart nummer to. Dries Van Gestel (Beligum/Topsport Vlaanderen-Baloise) har den gule trøya. Rittet held fram i Odda.
Har du bilete frå rittet, så send dei gjerne til HF anten som e-post eller på Facebook.
