Berre nesten i volleyball-NM
J15-laget til Strandvik IL Volleyball, som har tre kvemmingar på laget, var nær pallen i noregsmeisterskapen.
Meisterskapen vart arrangert i Kristiansand 4.–7 april. Strandvik, som spelar heimekampar og trenar i Eikelandsosen, hadde sendt både J15-laget og G15-laget til Kristiansand.
Torbjørn Milde trenar begge laga.
– Jentene viste kjempeform og ein fantastisk lagmoral, og spela seg heilt til semifinalen. Der vart det eit marginalt tap mot KFUM Stavanger, laget som til slutt vann NM, fortel han.
Ein gut frå Strandebarm spelar på G15-laget. Ifølgje Milde gjorde også gutelaget ein god figur.
– Gutane vann si gruppe og gjekk vidare til 8.-delsfinalen. Dessverre vart det tap mot Stovner Sportsklubb. Gutelaget enda på 13.-plass, fortel han.
Madelen Oma, Eirin Berge Bu og Elina Eik Nygård frå Strandebarm spelar for jentelaget. Matthew Nernes spelar for gutelaget.
Laga fekk ikkje lang tid til å kvila. Torsdag reiste både spelarar og trenar til Haugesund for å delta i U17-NM.
