Bergtun klinka til med toppløp
Malin Auganæs Bergtun har fram til no hatt ein trøblete sesong. Sundag losna det skikkeleg for Norheimsund-jenta. Bergun feia ned alle blinkane og gjekk inn til siger.
– Det er utruleg godt å kjenna at det fungerer igjen, sjølv om eg framleis har ein god del å gå på i sporet. Men det var framgang samanlikna med dei andre noregscuphelgane. Også på standplass var det betre enn det har vore, seier Bergtun etter at ho har konkurrert på historisk grunn på Stiklestad.
Sigeren sundag kom som tinga for fjorårets kongepokalvinnar i noregsmeisterskapen i Vik i Sogn. 25-åringen opplevde den største augeblinken som skiskyttar då ho sette alle konkurrentar på plass.
Det vart både gullmedalje og kongepokal med på kjøpet. I ettertid var det fleire private team som ville ha Bergtun med på laget inn mot ein ny sesong.
– Bra opplegg
– Eg valde å verta ein del av Trondheim Biatlon, og har ikkje angra på det. Me har eit bra sportsleg opplegg, godt miljø og ikkje minst ein flink trenar. Erika Oskarsson, som i fjor hadde ansvaret for det svenske rekruttlandslaget, kom inn som trenar. Den svenske jenta har vore eit friskt pust. Oskarsson har heilt klart bidrege til at det er høgt nivå på trening, seier Bergtun.
Ho har streva ein del med sjukdom både i oppkøyringa og etter at sesongen var i gang. Det har ført til at kvemmingen ikkje har fått den kontinuiteten ho har ynskt i treningsarbeidet. Studenten, som denne vinteren skriv masteroppgåve, har lyfta seg fysisk det siste året, sjølv om ho kanskje ikkje har fått prova det så langt i vinter. Testane i fjor haust var opplyftande.
Drøymer om utlandet
Bergtun drøymer – i likskap med dei fleste andre som kjempar i toppen i noregscuprenna – om å få konkurrera i IBU-cupen, som er ei form for verdscup B.
Nålauga for å få representasjonsoppgåver er trongare enn nokon gong. Det krevst minst noregscupsiger for å koma seg utanlands på skiskyttarforbundet sin kostnad. Det «kravet» har Bergtun no innfridd.
Ho var ikkje den einaste av kvemmingane som innfridde på Stiklestad. Hanna Børve viste seg frå si beste side. Børve var endeleg tilbake i toppen i sprinten. Øystese-jenta både gjekk fort og skaut bra, og kunne kvittera ut ein knallsterk 2.-plass. Junior-NM i Tromsø om ein liten månad er eit av hovudmåla i vinter for den dedikerte skiskyttaren.
Også Hedda Høen Mo og Andrea Sørheim Almeland, som representerer Kvam Langrenn- og Skiskyttarklubb og Team Gla´laks, konkurrerte båe dagar. Dei deltok i klassen K17.
