Bergtun avrunda med sølv i NM: — Veldig nøgd med det eg har prestert

Bergtun la grunnlaget for det som vart Hordaland-sølv i krinsstafetten. Ho gjekk ein flott startetappe og sørgde for at lagveninnene fekk et bra utgangspunkt.

Det er ikkje sikkert at det hadde vorte medalje på kvemmingen om det ikkje var for at Sindre Gjøsæter frå Øystese var på rett plass til rett tid. Han stod nemleg strategisk plassert då den nybaka kongepokalvinnaren brakk staven. Gjøsæter sytte for at klubbveninna i Kvam Langrenn- og Skiskyttarklubb raskt fekk ei ny stav og kunne halda fram.

— Eg er veldig nøgd med det eg har prestert i denne noregsmeisterskapen. Gull, sølv og 6.-plass er langt betre enn det eg håpa på då eg kom hit. Sjølv om eg forstod at det kunne vera mogeleg å kjempa om gode plasseringar, då fleire av dei beste mangla. Det var likevel eit sterkt startfelt, ettersom dei fleste som har gjort det bra i IBU-cupen og fleire landslagsløparar var med, seier ho.

Kom på eksklusiv liste

Ho fekk på bilturen tilbake til Trondheim god tid til å reflektera over det som har skjedd dei siste dagane. Kvam-skiskyttaren var med og skreiv norsk skiskyttar- og idrettshistorie då ho vann sprinten. 25-åringen figurerer no på den eksklusive lista over skiskyttarar som har vunne kongepokal. Ole Einar Bjørndalen, Emil Hegle Svendsen, Tarjei Bø, Johannes T. Bø, Marte Olsbu Røiseland, Tiril Eckhoff og mange andre er med på den same oversikta.

— Korleis påverka sigeren fredag oppladinga til fellesstarten laurdag?

— Eg må innrømma at det vart litt ekstra «støy» etter at eg vann. Det kom mange telefonar og meldingar. Det var stor stas, sjølv om det ikkje var så lett å kopla ut. Eg brukte meir tid på telefonen utover ettermiddagen og kvelden enn eg plar. Det var vanskelegare å få blund på augo enn vanleg, seier gulljenta, som fekk ein stor motivasjon da ho skaut fullt hus og vann sprinten.

Var i posisjon

Bergtun hadde von om å bita godt frå seg på fellesstarten, som er ei av hennar favorittøvingar. Kvemmingen var i posisjon til å kjempa om ein ny NM-medalje heilt til ho mista eit skot på andre liggjande skyting. Det førte til at det lokale stjerneskotet måtte plukka fram eit ekstraskot.

— Det kosta meg nokre sekund, og dermed måtte eg sleppa tetgruppa som eg kom samtidig med inn på standplass. Den luka klara eg diverre aldri å tetta. Eg brukte mykje krefter i håp om at eg skulle klara å få kontakt med Juni Arnekleiv og dei andre. Diverre lukkast eg ikkje, seier Bergtun, som enda på 6.-plass.

Det kunne ha vorte medalje dersom ho hadde unngått uhellet tidleg i rennet.

Ho ser no fram til ein rolegare periode etter ein vinter med mange renn. Bergtun har bestemt seg for å halda fram skiskyttarsatsinga, og neste sesong vonar ho å prestera så godt at det blir IBU-cupdeltaking. Det vert i alle fall målet.