Badeprisar i Jondal vert kopierte
Ullensvangarane skal få eit trygt, godt og likt badetilbod. Prisane i Jondal, med ein liten auke for nokre billettypar, vert nytta som utgangspunkt.
Innbyggjarane skal få eit både trygt og godt badetilbod med tilnærma like tenester og prisar i dei seks symjeanlegga i Ullensvang. Det går fram av eit framlegg rådmannen ber kommunestyret vedta 21. desember.
Kommunestyret har tidlegare bede rådmannen fremja ei sak om prisar og rabattordningar for dei offentlege bada, med tanke på bruka dei som eit ledd i folkehelsearbeidet.
Om lag som før
Dei føreslegne prisane i Ullensvang for enkeltbillettar for born og vaksne frå 1. januar 2023 vert dei same som dei er i Jondal, høvesvis 40 og 80 kroner. Sesongkort for born og vaksne vert litt billegare enn dei er i Jondal i dag. Honnørbillettane og familiebillettane vert litt dyrare.
Dermed fekk ikkje leiar Gudmund Toreid i Jondal Idrettslag fullt gjennomslag for framlegget han sende kommunen tidlegare i haust. Han tok til orde for å differensiera prisane etter kva tilbod dei ulike bygdene har.
Rådmannen føreslår at kommunen bør ta kontakt med lag og organisasjonar med mål om å inngå avtalar om «folkebading» kvar veke. Opningstidene skal i størst mogleg grad tilpassast tider der erfaringstala syner at behovet er størst. Eit sesongkort skal gje tilgang til alle dei seks symjeanlegga i kommunen, ifylgje framlegget.
Manar til samarbeid
Innandørsbassenga er høgt skatta, ifylgje rådmannen. Det nyaste symjeanlegget har Jondal, som fekk rusta opp det 16,7 meter lange bassenget i 2019. Dei andre anlegga ligg i Odda, Røldal, Skare, Hauso og Kinsarvik.
Symjeanlegga er etter koronapandemien drivne berre i offentleg regi. Tidlegare har det vore eit samarbeid med lokale idrettslag, noko ein kan sjå føre seg i framtida òg. Bassengdrifta er dyr, men har stor verdi for innbyggjarane, skriv rådmannen.
Eit lovpålagt livbergingskurs kan organiserast med hjelp av kommunalt tilsette instruktørar. Det er ein jobb å gjera med å skaffa mange nok badevakter og sikra livredningskompetanse, påpeikar rådmannen.
