Avslutta svært god sommar på fonna

Ein av dei som hadde teke turen til fonna, var alpintrenar Martin Sylvester-Davik frå Tertnes Alpint sitt ungdomslag. Laget plar vera på Folgefonna i sommarhalvåret, men i år har det vorte ekstra mykje. Davik er overtydd om at treninga laget legg ned, kjem til å hjelpa ungdomane når vinteren kjem og konkurransane tek til.

– Det er kjempeforhold her oppe, seier Davik.

Laget hans består av rundt 15 unge alpinistar i alderen 12–16 år. Gjennom sesongen trenar dei to gonger i veka og deltek i renn i helgane. Dei deltek i mange nasjonale konkurransar gjennom heile vinteren. Nokre av dei beste på laget får gode plasseringar i noregsmeisterskapen og kvalifiserer seg slik til tevlingar i utlandet. Nokre av dei som er på laget, hevdar seg heilt i verdstoppen, ifølgje Davik. Laget hans fekk ein brå slutt på treningane då koronaviruset råka landet. Tertnes har sin «heimebane» i Eikedalen på Kvamskogen.

– Er det ikkje snø der, reiser me til Geilo, fortel trenaren.

Nesten rekord

Ifølgje den lokale ringreven Alv Espeland (71) er det berre éin gong tidlegare at skitrekket har stengt seinare enn i år. Det var då sesongen vart avslutta 2. november 2008.

Espeland seier at mange har nytta litt av sommaren til å stå på ski. Det har vore flest norske, men også ein del utanlandske lag som har teke turen. Espeland, som i tillegg driv overnatting heime på garden, seier det ser ut til at koronaviruset ikkje har råka sommarskisenteret så hardt som fyrst frykta. Dagleg leiar Michael Iversen i Visitfonna AS stadfestar dei gode tala.

– Me har hatt om lag 21.000 passeringar i heisen, seier Iversen.

Iversen torer ikkje å seia når vegen opp til trekket stengjer, men at Ullensvang kommune har sett opp ein bom som dei stengjer når vegen er uforsvarleg å ferdast på. Det er likevel ingen aktivitet som skjer på skisenteret no etter sesongavslutninga, anna enn nedpakking av diverse utstyr.

Rosar kunnskapen

Iversen rosar all kunnskapen til Espeland.

– Utan Alv hadde ting vorte vanskelege, seier han.

Espeland har bidrege med rutine han har opparbeidd seg gjennom over tjue år med arbeid på isbreen. Han har vore med seint og tidleg for å flytta snø, preparera løyper og gjera trekket klar for gjestene. I år har han dessutan hjelpt til med endå meir satsing på langrenn. Satsing på langrenn er berre eitt av mange trekkplaster skisenteret har satsa på i år.

– Me marknadsførte oss aktivt mot barnefamiliar tidleg i år, seier Iversen.

Leiaren har tru på at satsinga har medverka til suksessen i år. Han seier at gunstige snøforhold har gjort det lettare å driva. Sjølv om Alv vart 70 i fjor, har han ikkje planar om å gje seg heilt enno Tvert om aktar han å vera med å hjelpa så lenge helsa held.

– Når ein ligg under maskinene og skrur, innser ein at ein ikkje er nokon ungdom lenger, seier Espeland og ler.