Avslutta sesongen med NM-medalje
Malin Auganæs Bergtun runda av sesongen med pallplassering i noregsmeisterskapen i skiskyting i Alta i helga.
Alta Skiskytterlag skipa til NM for seniorar. I tillegg gjekk juniorane finalar i ASKO-cupen. Både Bergtun, Hanna Børve og Andrea Sørheim Almeland, som alle representerer Kvam Langrenn- og Skiskyttarklubb, tok turen nordover for å gå dei siste renna for sesongen.
I år som i fjor vart det medalje på Bergtun i krinsstafetten. Medan det vart sylv på Hordaland-jentene i fjor, tok Bergtun bronse saman med Ragnhild Femsteinevik frå Hålandsdalen og Une Kvelvane frå Voss sundag. Kvemmingen gjekk 2. etappe for Hordaland Ssk 1. Vestlandsjentene var 1.11,3 bak vinnarlaget, Buskerud Ssk 1. Fyrstelaget til Oslo og Akershus tok 2.-plassen.
I sprinten fredag kom Bergtun i mål på 19.-plass. Laurdag skaut ho fire fulle hus i fellesstarten og vart nummer 12.
Til HF skriv jenta frå Norheimsund at ho var nøgd med prestasjonane i helga, spesielt på standplass. Ho fortel at ho aldri før har hatt 20 treff i NM.
Bergtun er også nøgd med eigen innsats på stafetten.
– Forma var heilt grei, men ikkje på topp. Men det var veldig kjekt å gå saman med dei andre jentene, og eg synest at eg gjekk ein god etappe for laget, skriv kvemmingen til HF.
Både Børve og Almeland gjekk fellesstarten laurdag. Rennet var det siste i noregscupen. Medan Børve vart nummer 10 i klassen for 20–22 år gamle kvinner, vart Almeland nummer 14 i K17.
Samanlagt i noregscupen enda Bergtun på 8.-plass i kvinner senior. I klassen for 20–22 år gamle kvinner kom Børve på 4.-plass. Andrea Sørheim Almeland kom på 16.-plass og Hedda Høen Mo på 21.-plass i klassen for 17-åringar.
