Avslutta helga med eit smell

– Før eg skal skyta, tenkjer eg på så lite som mogleg, seier Bjørke.

Han tykkjer det går greitt å halda seg roleg, sjølv når han skyt i ein finale. Søndag tok Hardanger-skyttaren sølvmedalje på heimebane i klassen Eldre Rekrutt 14—15 år.

Som liten vart Bjørke dregen med av far sin. No har han drive med skyting i om lag seks år. Idretten gav meirsmak. 15-åringen fortel at han har delteke i fleire konkurransar enn han kan telja.

Lange dagar

Tidlegare leiar i Hardanger skyttarlag, Dag Skår, var med i komiteen som arrangerte. Han fortalde at over 80 funksjonærar bidrog til at helga skulle gå knirkefritt. Ifølgje Skår er dette det største arrangementet dei har hatt ansvar for, fordi det inneber både felt- og baneskyting.

Etter ein koronapause på kring tre år var Vestlandsstemnet tilbake. Fyrste planleggingsmøte gjekk føre seg i februar 2022, og sidan då har det vore lagt ned mange timar for å førebu stemnet.

– Me har jobba minst 200 prosent den siste veka, seier Skår.

Han fortalde at enkelte har vore på plass frå klokka sju om morgonen til tolv på kvelden. Arbeidet lønte seg og helga har vore ein stor suksess, konstaterte Skår.

– Det har gått veldig bra! Me har fått mykje skryt, seier han.

Skår sender rosen vidare til alle funksjonærar som har stått på for å gjennomføra stemnet. Kjøkenet har hatt full bevertning, parkeringsvakter har sørgt for system, felt- og banepersonell har organisert og premienemnda har samla inn premiar. Premiebordet enda til slutt på ein verdi av 110.000 kroner.

- Får eit kick

I tillegg til å vera arrangør var Skår deltakar i helga. Han var med på sitt fyrste landslagsstemne i 1978, og har ein lang skyttarkarriere bak seg. Skår synest sporten er spanande og moro.

– Ein får eit kick når blinken er midt i siktet og det smell, seier han.

Skår trekkjer også fram det sosiale aspektet, og at idretten fører fleire generasjonar saman. Han tykkjer det er positiv at jenter og gutar er likestilte og skyt i same klasse.

– Jentene er i mindretal, men dei er som regel rasande gode! slår Skår fast.

Han fortel at Hardanger skyttarlag har deltakarar som hevdar seg i dei fleste klassane. Skår synest helga har vore ei kjekk oppleving – mykje takk vere god planlegging og førearbeid.

– Det vert nok ei stund til neste gong — det har vore ganske krevjande. Men det er vel slik det skal vera, seier han.

Mykje logistikk

Baneskytinga fann stad ved anlegget i Vangdalsåsen, medan feltskytinga gjekk føre seg i Strandebarm. Dei to ulike lokalitetane førte til ekstra utfordringar.

– Me sat i fleire kveldar for å finna ut av logistikken, seier leiar Arve E. Kolltveit i Hardanger skyttarlag.

Han fortel at skyttarlaget vart vald ut til å arrangera Vestlandsstemnet i 2020, men at det ikkje lèt seg gjera før i år på grunn av pandemien. Ifølgje Kolltveit har komiteen jobba intensivt med førebuingar den siste månaden.

– Eg har nesten ikkje hatt tid til å vera heime, seier han.

Hardanger skyttarlag hadde rundt 40 påmelde deltakarar i helga. Kolltveit konkurrerte også sjølv, og enda på 3.-plass i klassen V65. Ifølgje han er det vanskeleg å hevda seg når ein er arrangør.

– Ein spring fram og tilbake og er oppteken av arrangementet. Plutseleg skal ein inn og skyta, fortel han.

Kolltveit er veldig glad i den sosiale delen av skytinga. Han synest det er kjekt at folk frå 10 til 80 år kan liggja side om side og halda pusten før det smell.

Sjå oversikt over medalje- og stjernevinnarar: