Avrunda cupen med 19 av 20 treff: — Skikkeleg «sukkerføre»

Over 70 løparar tok turen til skistadionet på Sjusete då Kvam Langrenn- og Skiskyttarklubb arrangerte dei to siste renna i Gla´laks-cupen i skiskyting. På programmet stod normaldistanse laurdag og sprint sundag.

Vil satsa vidare

Hedda Høen Mo vann sin klasse båe dagar. Då lokalavisa snakka med henne laurdag, hadde ho akkurat kome i mål etter å ha gått fort og skote to fulle hus. Ho var godt nøgd med løpet.

— Det var litt trått å gå i dag. Det var skikkeleg sukkerføre. Men alt i alt gjekk det veldig fint — særskilt med skytinga, seier Mo.

Sesongen har ikkje vorte heilt som ynskt for Mo, som har gått glipp av fleire større renn. Tidlegare i vinter vart ho smitta og fekk covid-19. Dermed gjekk ho mellom anna glipp av hovudlandsrennet i Holmenkollen, som var det største målet for sesongen.

15-åringen går siste året på Kvam ungdomsskule. Ho ynskjer å satsa vidare på skiskyting og fortel at ho har søkt seg plass på toppidrettslina på Voss gymnas til hausten.

— Det er dette eg likar og ynskjer å halda fram med, seier Mo.

Sjå bileta frå normaldistansen laurdag her:

— Skikkeleg god glid!

Sigrid Norheim var veldig imponert over farten lagveninna held i sporet. Ho tykkjer det er kjekt og inspirerande å fylgja med på dei eldre løparane.

Også Norheim deltok båe dagar. Ho har funne roa på standplass og plaffa like godt ned alle blinkane på både normaldistansen og sprinten. Ifylgje henne var tilhøva i løypa noko utfordrande, men skia kunne ho ikkje klaga over.

— Eg hadde skikkeleg god glid! Pappa smurde dei i går, fortel Norheim.

Ho tykkjer det er kjedeleg at sesongen snart er over. No står berre Bama Liatoppen Skiskyttarfestival på Ål att for dei unge skiskyttarane.

Ressurskrevjande

Rennarrangøren var godt nøgd. Ifylgje rennleiar Anita Aalvik hadde det gått roleg og fint føre seg på standplass, og lite vind syrgde for veldig gode skytetilhøve.

Å stella i stand eit slikt arrangement er ressurskrevjande. Mellom 30 og 40 funksjonærar var i sving.

— Det er takka vere dei at me får til å gjennomføra eit slikt arrangement, seier Aalvik.

Vann samanlagt

Etter rennet sundag delte styret i Hordaland skiskyttarkrins ut premiar til jentene og gutane som vann sine klassar i alderen 13—16 år i Gla´laks-cupen. I tillegg fekk dei tre beste i kvar klasse eit gåvekort.

Andrea Sørheim Almeland har levert fleire gode løp i vinter og vann klasse J16. I same klasse kom Hedda Høen Mo på delt 3.-plass. Jakob Aarekol Botnen og Torje Laupsa Mo enda på kvar sin 3.-plass samanlagt i G13 og G14.