– Alltid kjekt med medalje
Bjørnar Sandnes Lillefosse frå Strandebarm reiste ikkje tomhendt frå noregsmeisterskapen i friidrett.
På førehand hadde Lillefosse spådd at det kunne verta medalje om alt klaffa. På grunn av turnusarbeid som lege har kvemmingen måtte trena på ein annan måte i år. Han har heller ikkje hatt høve til å delta i konkurransar før NM. I meisterskapen var han påmeld til tre øvingar, men valde å stå over 1.500 meter for å ha eit best mogleg utgangspunkt på 5.000 og 10.00 meter.
– Det vart ikkje eit typisk meisterskapsløp, seier 30-åringen om 10.000 meteren.
For dei som vil delta i internasjonale meisterskapar, er nemleg dei nasjonale meisterskapane ein viktig arena å sanka rangeringspoeng på. Det inneber at ikkje berre plasseringa på resultatlista, men også tida har noko å seia. Eit vanleg meisterskapsløp startar roleg og aukar intensiteten. I NM var det fullt køyr frå start.
Forma prega
Det var på 10.000 meter Lillefosse tok medalje. Det vart hans 3. bronse på distansen. Vinnaren, Zerei Kborom Mezengi, tok sølv i øvinga under EM i fjor. Han kom i mål 50 sekund før Lillefosse. Sølvvinnaren Senay Fissehatsion var endå nærare strandbermingen. Under 6 sekund skilde dei.
– Litt surt at sølvet rauk, men alltid kjekt med medalje, seier kvemmingen.
På 5.000 meter vart det ein 5.-plass for Lillefosse, 19 sekund frå bronsemedaljen. Han trur likevel at det hjelpte han til medaljen på den dobbelt så lange distansen. Eit løp friskt i minnet og i beina gjorde noko med konkurranseforma hans, som er prega av lange dagar på jobb.
– Kjensla vart betre på 10.000 meter, seier han.
Også NRK-kommentator Jann Post beundra løpet til Lillefosse, med det treningsgrunnlaget og arbeidsmengda han har hatt i år.
– Det er ganske så imponerande å ta ein bronsemedalje her, sa Post då Lillefosse kryssa mållinja.
København neste
Neste løp for Lillefosse vert ein halvmaraton i den danske hovudstaden i september. Etter det er målet å springa ein vanleg maraton i desember.
– Eg ynskjer å sjå kva tider eg kan få på distansane, seier Lillefosse.
Krava for ein plass i internasjonale meisterskapar som OL og VM er tøffe i friidrett, særleg i baneøvingane. Lillefosse har von om at gode tider på lengre distansar kan gje han plass.
– Men det er langt å springa, seier han.
Ein maraton er fastsett til å vera 42.195 meter. Altså over fire gonger så langt som øvinga Lillefosse er van med å delta i. Han trur likevel at han kan klara gode tider.
– Eg spring mykje i løpet av ei veke med trening, så det skal gå bra, seier han.
