Alle gode ting er tre
Rossvoll Volleyballklubb gjorde reint bord i Oslo i helga som var: tre dagar, tre kampar og tre sigrar.
Det opplyser klubben i ei pressemelding.
Den storslagne helga byrja med 3–0-siger mot OSI 2. Ifylgje hovudtrenar og lagkaptein for 1.-divisjonslaget, Jon Erlend Haukås, klarte laget å spela opp mot sitt beste gjennom heile kampen.
Det er ifylgje han sjeldan kost. Laget har ein tendens til å vera veldig opp og ned i nivå gjennom ein kamp, skriv han til HF.
Asker/Vikersund var motstandar laurdag. Planen var fyrst å rotera ein del på laget, men austlendingane viste seg å vera sterkare enn venta. Etter ein seig start fann kvammalaget rytmen att til slutt. Kampen enda 3–1 til Rossvoll.
Også kampen sundag enda med 3–1-siger, då mot Sarpsborg. Laget låg rett over Rossvoll på tabellen før helga, og det vart ein skikkeleg «slitekamp», ifylgje Haukås.
Kampane sikra Rossvoll-gjengen ein 5.-plass, som gjer at dei kan spela opprykksturnering til eliteserien dersom dei vil det. Om det er noko laget vil gjera, har ikkje spelarane diskutert enno, seier Haukås.
