«AK» måtte avbryta sørpolferda
Få dagar før han kunne ha nådd Sørpolen, fekk kvemmingen eit helseproblem.
Arne-Kristian Teigland frå Øystese har slite tungt i fleire dagar som fylgje av dårleg sikt og utfordrande terreng, ifylgje lydmeldingane han har sendt via heimesida til ekspedisjonen. På dag 17 gjekk han den tyngste skituren så langt i livet fortalde han.
Likevel har han makta å halda på leiinga han har hatt til Vincent Colliard, sjølv om ho har minka dag for dag som fylgje av dei vanskelege tilhøva.
Målet var nemleg å slå Colliard og setja ny verdsrekord frå Hercules Inlet til polpunktet. Colliard bruka vel 22 dagar på turen.
2. januar, med ikkje mange dagar att av ekspedisjonen, svima Teigland av på isen i Antarktis. Han fekk reist teltet og varsla Antarctic Logistics & Expeditions LLC (ALE) om problema, og vil verta henta med fly for å få ein medisinsk sjekk ved Union Glacier. Han skal etter forholda ha det bra.
Talsmann Rune Mo-Bjørkelund i «AK til Sydpolen» var i kontakt med polfararen i kveld. Han fortalde då at han kom til seg sjølv med hovudet mellom skituppane etter hendinga i dag. Han er innforstått med at liv og helse må gå fyrst, og at det er rett å avbryta. Han låg i kveld i teltet, var varm og hadde nok mat, fortel Mo-Bjørkelund.
Han seier at Teigland hadde gått 951,4 kilometer fram til leiren han gjekk frå i dag tidleg. Med andre ord var det «berre» knapt tjue mil att av dei 1.130 kilometerane til polpunktet.
