Aamund er i teten før finalen

250 poeng med 20 innertiarar sikra jondølingen den gjæve plassen før dei ti avgjerande skota onsdag klokka 10.25.

– Det var sjokkerande for meg òg! seier Selsvik til HF på telefon frå Trøndelag.

Best når det gjeld?

Han fortel at resultatet er ny personleg rekord, men at han har oppnådd den same summen poeng med færre innertiarar før. I konkurranse hende det faktisk førre gong på Landsskyttarstemnet på Voss i fjor. Den gongen enda han på 38.-plass etter å ha mista to poeng i finalen.

– Det er noko med det når ein skyt så store stemne. Nokre ser ut til å få nervar, men for meg ser det ut i staden ut til å gå betre, seier Selsvik.

Han fortel at det såg helst dårleg ut då han fyrte av prøveskota før alvoret laurdag, men at det kom seg til den fyrste serien. Sidan gjekk det berre éin veg.

Ein annan hordalending, Mathea Lovise Junge Hauger frå Stord, ligg på skive 2 med same poengsum og like mange innerblinkar som jondølingen. Det er ein spesiell og gjerne frykta posisjon å vera i. Der har ein nemleg alt å tapa – og å vinna.

– Det er ikkje der du har lyst til å vera, men eg skaut på skive 1 i den innleiande skytinga òg, så eg har prøvd det, seier Selsvik og ler.

– Er du nervøs før finalen, og korleis førebur du deg til han?

– Eg kjenner godt på det, ja. Eg prøver å fokusera mest på korleis eg skal gjera ting, og eg går nøyaktig gjennom kva eg skal gjera med kvart skot når me ventar i oppropsteltet, seier han.

Tysdag står den innleiande feltskytinga for tur for Selsvik. Vona er full pott der, sjølv om det ser ut til å verta ein våt dag. Onsdag er det meldt opphaldsvêr.

Han fortel at jondølingane bur litt spreidd i år. Sjølv held han og familien til på ein campingplass.

14 skyttarar frå Jondal har meldt seg på til årets «LS». 35 skyttarar frå Hardanger er påmelde.

Fleire med suksess

Veslebroren til Aamund, Jarand, er med knapp margin klar for feltfinale fredag og sikra seg stort beger i rekruttklassen etter å ha prestert resultatet 29/12. Han ligg på 27.-plass før finalen. Som om ikkje det var nok, fekk han medalje og det 3. beste resultatet av 247 deltakarar i den såkalla minneskytinga i feltrunden, der han presterte 60 av 60 oppnåelege poeng.

Også fleire andre av dei lokale heltane ligg godt an:

• Kristine Solheim Wikane frå Jondal var med 30/18 nummer 2 i den innleiande feltskytinga i klasse eldre junior tysdag kveld.

• Jonas Bjørke frå Hardanger er nest best før finalen i feltskyting i juniorklassen. Han enda på 30/25, etter å ha avslutta den innleiande skyting med 6/3 på det siste haldet. Dimed hamna han innertreffet bak Asbjørn Ågedal frå Evje og Hornnes. Finalen er fredag.

• Johannes Skaar Bakke frå Hardanger er klar for banefinalen i klasse V73 tysdag kveld. Med 249 poeng og 17 innertiarar ligg han på 22.-plass.

• Steinar Vik er feltfinaleklar i V65 med 30/23. Finalen er fredag.

• Terje-Mo Bjørklund frå Hardanger er med 29/17 nummer 9 av 333 i felttevlinga i klasse 2.

• Kjetil Skår frå Hardanger ligg godt an i felttevlinga med 30/23 i klasse 2–5, V55 og eldre junior. Bjørnar Wikane frå Jondal fekk fullt hus, men berre 11 innertreff.

Klatremus frå Tørvikbygd

Elles vart Magne Lysen frå Hardanger nummer 9 i klasse V55 med 345 poeng. Med 100 poeng i finalen måndag avanserte han like godt heile 23 plassar på resultatlista. Dag Lien frå Løiten vann med 348 poeng.

I samlagsskytinga for seniorar måndag vart Hardanger og Voss med 387 poeng nummer 4 av 47 samlag, 3 poeng bak vinnar Sunnmør. Trine Flotve (97 poeng), Bjørnar Wikane (96), Kjetil Skår (98) og Liv Sollesnes (96) representerte hardingane og vossingane.

Rekruttane og juniorane enda på 16.-plass med 389 poeng. Aamund Selsvik (99), Vegard Eide Aase (99), Tuva Lerfall Alvsåker (91) og Jonas Bjørke (100) stilte opp for Hardanger og Voss. Vestfold vann med 397 poeng.

Veteranane i samlaget fekk det tøffare måndag. 389 poeng heldt til 30.-plass av 45 samlag. Sunnfjord vann med 399 poeng.

Tysdag skyt dei beste skyttarane i klasse 5 på banen. Mellom dei er den firedobbelte skyttarprinsessa Liv Sollesnes frå Jondal. Ho vart sist prinsesse i Bodø i 2011.