85-åring byrja med bordtennis
Berit Fonneland (86) provar at det aldri er for seint å prøva noko nytt. I haust prøvde ho bordtennis for fyrste gong. Sporten har gjeve meirsmak.
Kvar torsdag føremiddag samlast ein gjeng i Hardanger Bordtennishall i Steinsdalen for å spela og drikka kaffi saman.
– Me kallar oss visst for «pensjonistpartiet», fortel Fonneland.
Hoppa i det
Ho har alltid vore glad i ballsport. Ho nølte difor ikkje då ho fekk tilbod om å vera med på bordtennis i fjor haust.
Når bladfyken er innom, er det om lag ti spelarar i hallen. Ifølgje Fonneland handlar sporten om meir enn å slå ein ball.
– Eg vart litt forundra over at det ikkje berre er å ha ein racket i handa. Ein skal halda godt fast! fortel ho.
Fonneland er ikkje redd for å prøva nye ting. Gjennom bordtennisen har 86-åringen vorte kjend med folk i ulike aldrar.
– Her kan alle koma som dei er, seier ho.
– Eit dilemma
Sporten har mange reglar, fortel 86-åringen, men ho tykte det var enkelt å setja seg inn i dei. Samstundes lærer ho stadig nye ting. Konkurranseinstinktet er ikkje så stort – Fonneland tykkjer berre sporten er morosam. I tillegg til godt sosialt fellesskap og kjekke kampar synest ho at bordtennis gjev god mosjon.
– Det er mykje rørsle. Ein må bøya seg ned for å plukka opp ballen. Det er ein del ballar som dett på golvet. Eg tek det som trening, seier ho.
Fonneland tykkjer det er kjekt å ha noko å gjera på føremiddagen. Heime likar ho å driva med hagearbeid. I tillegg har 86-åringen lyst til å byrja på dans. Det er berre eitt problem: Dansen er på same tidspunkt som bordtennisen.
– Det er verkeleg eit dilemma, fortel Fonneland.
