223 deltok i renn
Mange fann fram skia i Jondal i 2023.
I alt deltok 223 i renna i regi av skigruppa i Jondal Idrettslag. Av desse deltok 157 i Telenorkarusellen. All deltaking var gratis. Det opplyser idrettslaget i eit nyttårsbrev på den nye heimesida.
Skitilhøva var gode, og rennsesongen vara frå tidleg i januar til seint i mars. Det vart skipa til seks lysløyperenn, lagsmeisterskap og Olastølrennet.
Karusellen vart gjennomført for aldersgruppa 0–12 år med ordinær klasseinndeling, og alle deltakarane fekk kvar si lue som deltakarpremie. Karusellen er eit samarbeid mellom Skiforbundet og Telenor med føremål å hjelpa idrettslag med arrangering av og rekruttering til skirenn.
Den gamle trakkemaskina er flytta frå Vassendeløypa til Storemyr, og skigruppa håpar ho har mange gode driftsår att.
Skigruppa takkar born, foreldre og funksjonærar for ein «knirkefri» 2023-sesong. Foreldre og funksjonærar har bidrege ved start og målgang, med resultatsystem, kiosk og vasking og rydding.
