Veit du kva ei blindsone er?
For to veker sidan hadde 3. klasse på Øystese skule trafikkveke. I samband med refleksdagen torsdag 21. oktober fekk elevane læra kva ein må vera obs på når ein ferdast langs vegen. Er du lett å få auga på?
— Om eg sit der, er dette raude feltet vanskeleg for meg å sjå, seier Hallvard Bjørke.
Hallvard er lastebilsjåfør hjå Jan Mo AS, og vart presentert som lastebilekspert for borna. Han peika og viste på skjermen kva område rundt lastebilen han ikkje ser frå setet sitt. Området var stort, og det heiter blindsone.
Elevane fekk òg sjå ein film. På filmen var det ei jente som gjekk langs vegen og kikka på telefonen sin. Ein lastebil stoppa for ein fotgjengar, og då jenta gjekk opp langs sida på lastebilen, såg ikkje sjåføren henne.
— Det er eit godt eksempel på at de må vera merksame og fylgja med når de går langs vegen, og når lastebilar står parkerte. Plutseleg startar bilen opp. Om du er i blindsona, er det ikkje råd for lastebilsjåføren å sjå deg, sa Hallvard.
Sjå bilete frå skuledagen her:
Visste de frå før av at lastebilsjåførane ser så lite rundt bilen sin? spør Kristi Eknes, ein av lærarane.
— Nei, eg visste ikkje eingong kva ei blindsone var, kjem det frå ein elev.
Lastebilsjåføren, Hallvard, fortalde om ein gong han køyrde lastebil og ein personbil kom inn i blindsona. Han enda opp med å skubba bilen fleire meter.
Elevane vart delte i tre grupper då HF var på besøk. Ei gruppe fekk læra om skilt i klasserommet. Ei anna gruppe lyste etter refleksar med lommelykt, og den siste gruppa fekk vera med og sjå på lastebilen til Hallvard. Der fekk elevane lov til å setja seg i førarsetet. Då fekk dei sjølve sjå kor lite sjåføren ser rundt lastebilen.
— Det har handla om trafikk heile veka, seier Johan Aarekol Botnen.
Han er ein av elevane i 3. klasse.
— Har det vore kjekt?
— Det har vore kjedeleg. Eller nei. Det har faktisk vore litt kjekt, seier Johan.
— Kva har de lært i dag?
— Eg har lært at om ein lastebil kjem køyrande når eg skal gå over vegen, må eg sjå på sjåføren og vinka til han. Då veit eg at han ser meg, seier Shams Bohsas.
Shams synest det var kjekt å vera inne i lastebilen.
— Eg såg ikkje alle elevane som gjekk rundt, seier Shams.
— Når brukar de refleks?
— Eg brukar refleks når eg skal gå til bussen. Då brukar eg ofte slike på handa, seier Eline Lunestad.
— Er vaksne flinke til å bruka refleks, synest de?
— Nei, ikkje mammo og pappen, seier Eline.
— Kva skjer om me ikkje brukar refleks i mørker?
— Då kan det vera at bilen køyrer på oss. Utan refleks er det ingen som ser oss, seier Eline.
