Rullar og rullar, rundt og rundt

Selma Agata Pfeil Vikøy er ti år gamal. Ho er ei aktiv jente, og har fleire interesser. På fritida si går ho på kunst, riding, song og på skøyter.

— Eg synest det er skikkeleg moro å gå på skøyter, seier Selma.

Sundag 19. september var ho med på noko som heiter Kvammameisterskapet i Vikøy. Det er ein konkurranse for born og vaksne som går på rulleskøyter. Då går dei rundt ein asfaltert bane. Rulleskøytebanen i Vikøy ligg like ved Framnes Arena. Rundt banen er det omtrent 250 meter.

I konkurransen var den yngste sju år og den eldste 75 år. Alle kunne velja mellom å gå éin runde, to rundar eller fire rundar. Ein person på sidelinja tok tida med stoppeklokke. Ofte er det berre hundredelar som skil dei som konkurrerer.

Pass på

Når ein skal gå på rulleskøyter, er det lurt å bruka beskyttelse. Ellers gjer det ekstra vondt å falla i asfalten. Heldigvis skjer det ikkje så ofte. Dessutan har Selma fleire ting ho beskyttar seg med.

— Eg brukar alltid hjelm og har beskyttarar både på knea mine og på handledda, seier Selma.

Det finst beskyttelse til olbogane òg.

Sommar og vinter

Når det vert snø og glatt på asfalten, er det ikkje så lurt å stå på rulleskøyter. Det går nesten ikkje an. Då byter Selma ut rulleskøytene med isskøyter. Så dreg ho og dei andre utøvarane til Slåtthaug isbane i Bergen for å trena.

I fjor vinter var det så kaldt at det gjekk an å laga isbane utandørs i Vikøy. I seks veker kunne ho stå på skøyter ute så mykje som ho ville.

Vanskeleg

Det er ofte vanskeleg når ein skal gjera noko for fyrste gong. Kanskje får du ikkje til å stå på rulleskøyter med det same. Då lyt ein be om hjelp og øva.

Selma har øvd i fleire år. På treningane likar ho best å øva på å skyva ifrå med skøytene, og å hoppa. Då hoppar ho med skøyter på beina. Det er det ikkje alle som får til.