Midt i smørauga
Albert Torpe Jensen (12) brukar berre tre minutt frå døra heime til pulten på skulen.
Albert bur i ei av dei fem nye bustadblokkene på Stronde i Øystese. I blokka nærast Laupsa bur han i lag med mamma Margunn og storesyster Cornelia (14). Pappa Rune bur på Vavollen i Øystese, så Albert er ofte der òg.
– Kva likar du best med å bu på Stronde?
– At det er fint der.
– Og kva synest du er mest negativt?
– Det er ganske kaldt, sidan det ligg nær sjøen.
Leilegheita til Albert har tre soverom og utsikt mot fjorden. Framfor huset er det ein stor plen som det går an å leika på. Albert ser ikkje så ofte på utsikta, for han elskar gaming. Han trivst best når han kan sitja på rommet og spela i lag med vener. Han likar fleire ulike spel, men ser mest på YouTube. I tillegg likar han godt å spela fotball.
Av og til kranglar Albert og systera, innrømmer han.
– Det går ikkje at me er på kjøkenet i lag. Det blir krig.
– Kva er det de er usamde om?
– Om plassen. Eg skal laga meg mat, og ho kjem inn og vert sur.
– Men de er litt glade i kvarandre òg av og til?
– Eg veit ikkje. Av og til.
– Har du leikekameratar på din alder i blokkene på Stronde?
– Nei, eg har ikkje sett nokon.
– Bur det mange gamle der?
– Ja. Eg har ikkje vorte så godt kjend med dei enno.
Når Albert vil møta vener, tek han gjerne ein tur på sykkelen rundt i bygda. Han plar sykla til og frå skulen òg. Turen tek om lag tre minutt kvar veg.
Sjå skulevegen til Albert her:
Fram til familien flytta til Stronde i fjor, budde Albert i ei leilegheit i Tolvkonehuset. Det ligg endå nærare sentrum enn Stronde, så sjølv om han framleis bur sentralt, fekk han faktisk litt lengre skuleveg etter flyttinga.
– Om du fekk bestemma kvar du skulle bu i Øystese, kvar ville det ha vore?
– Eg veit ikkje. Eg er nøgd der eg bur no.
