Konfirmantane samla seg i Kvam: — Vert betre kjende og utvekslar tankar

Då lokalavisa tok turen til Framnes tysdag, var ein drøss med konfirmantar og andre unge og vaksne på veg til morgonmøte i idrettshallen ved skulen. Dei var alle deltakarar på konfACTION Vest i regi av Kristen Idrettskontakt (KRIK), som braka laus laurdag ettermiddag.

I gangen inn mot sitjeplassane stod smilande og jublande KRIK-leiarar og nærast heia ungdomane fram. Inne i hallen var det rigga til ei større scene, og musikken ljoma ut i rommet medan deltakarane kom seg på plass.

For dei frammøtte starta samlinga med nokre rundar «Hode, skulder, kne og tå». Vidare stod fellessong på norsk og engelsk, fleire av den livlege sorten, i tillegg til tale og ymse informasjon på programmet. Mange hadde møtt opp i skiklede og treningstøy og var klare for resten av dagen.

Fellesskap og aktivitet

Utanfor hallen venta fleire bussar. Dagane på leir har nemleg vore fulle av aktivitetar. Medan ein god gjeng vart frakta med buss til Kvamskogen for å stå på ski og snøbrett, vart andre køyrde til idrettshallane i Øystese og Norheimsund for å klatra og spela volleyball og fotball. Andre vart verande på Framnes, der dei var med på dans, brettspel og ulike kreative aktivitetar. Konfirmantane hadde med andre ord litt av kvart å velja mellom.

Ein jentegjeng frå Kvam var mellom dei som var i det kreative hjørnet. Då dei snakka med bladfyken, var dei klare for sin tredje dag med måling, hekling, strikking og perling. Oppgåvene kunne dei gripa fatt i på den måten dei sjølve ynskte, men kvar dag hadde ulike tema, fortalde jentene.

Dei var alle samde i at det var kjekt å vera på leir. Ifylgje jentegruppa var det fleire grunnar til at dei valde å nytta fyrste halvdel av vinterferien på konfirmantleir. Nokre av dei hadde fått høyra at dersom dei ikkje var med på leir, måtte dei ta att timane seinare. Fleire ynskte også å delta for fellesskapen sin del.

— Då eg fekk høyra at alle venene mine skulle delta, ville eg vera med sjølv. Eg hadde jo ikkje lyst til å vera heime åleine i ferien, seier Sunniva Tollefsen Vågen.

— Eg òg vart med fordi eg ville vera med venene mine. I tillegg tenkte eg at det var ei fin moglegheit til å verta kjend med andre, seier Ida Elise Buene.

Spanande og skummelt

Det å vera på leir kan by på mange inntrykk og setja kjenslene i sving, særskilt når det ikkje berre er ungdomar i Kvam som er samla, men også frå Birkeland, Sædalen, Olsvik, Etne og Skjold.

— Leiren verka veldig kjekk då eg fekk høyra om han i haust. Men då eg fekk vita at det var kring 200 påmelde, vart det litt skummelt å koma her òg, fortel Ronja Traa Ditmarsen.

Etter nesten tre døger på leir kunne Ditmarsen konstatera at det ho uroa seg for, ikkje var så farleg likevel.

— Det er veldig kjekt å få snakka saman med andre. Me har mellom anna vore samla i små grupper på kveldstid. Då har me delt tankar med kvarandre. Det er veldig spanande å høyra kva andre synest og meiner både om kristendomen og andre tema, seier ho.

Kvar kveld samla ei lita gruppe konfirmantar og nokre leiarar seg for å snakka om dagen. Samtalane tok gjerne utgangspunkt i talane frå kveldsmøta.

Agnes Buset er KRIK-leiar og høyrer til StudentKRIK Bergen. På leiren var ho ein av dei som hadde ansvar for nokre av dei kreative aktivitetane. I tillegg var ho med i samtalegruppa som Ditmarsen var ein del av.

— Det er viktig at alle blir sett og høyrde. I gruppa får alle moglegheit til å dela tankar og reflektera saman med andre, fortel KRIK-leiaren.

Ho er oppteken av at ungdomane skal få ta del i det kristne miljøet, og at alle skal kjenna seg ynskte og velkomne.

Tradisjon i familien

Dei kreative kvammajentene fortel at dei er godt i gang med opplegget dei må fullføra før dei skal konfirmera seg i kyrkja til våren. Dei har delteke på to av tre obligatoriske gudstenester og har fullført to—tre av fem valfrie.

— Kvifor vel de å konfirmera dykk kristeleg?

— I min familie har det alltid vore ein tradisjon. Alle har konfirmert seg kristeleg. Difor er det riktig at eg òg gjer det, seier Vågen.

Dei andre jentene i gruppa hadde same grunngjeving. Vågen la til at ho tykkjer det er interessant å få vita meir om kristendomen og høyra kva andre meiner og tenkjer.

— Og så vert ein betre kjend med andre som vel å gjera det same, seier Linnea Snilstveit Rykken.

— Oppleva ei anna side

Både kateket Mampion Andriamandimby og organist Sevinj Asgarova Øvrehus i kyrkja i Kvam var til stades på leiren. Damene har hatt hovudansvar for dei lokale konfirmantane. Båe fortel om ungdomar som hadde vore noko stille og forsiktige i byrjinga, men som gradvis vart meir husvarme.

— Det er ikkje så rart. Mange er jo stort sett vande med å vera med dei som dei allereie kjenner godt frå før, seier kateketen.

Det å vera saman på konfirmantleir gjev gode moglegheiter til å få vita meir om kristendomen, meiner Andriamandimby. Ho opplever at ungdomane er i den alderen der ein er nyfiken og har eit behov eller ynske om å læra meir om eiga tru.

— På leir får dei moglegheit til å verta betre kjende med kvarandre og utveksla tankar. I tillegg kan dei skapa nye relasjonar med konfirmantar frå andre stader, seier ho.

— Lite søvn

Konfirmantlærar Eivind Daniel Brakvatne Røed, kona Katrine Brakvatne Røed og Laila Kristin Traa, mor til ein av konfirmantane, har saman med Andriamandimby og Øvrehus hatt ekstra tilsyn med dei unge kvemmingane.

På leiren var dei vaksne losjerte inn på ulike klasserom i skulebygget på Framnes saman med ungdomane. I romma var pultar og stolar flytta til sides, og golva var dekte av soveposar, luftmadrassar, klede og tomme brusboksar og smågodtposar.

Øvrehus tykkjer at stemninga i gruppa har vore svært god. Men noko som truleg kunne ha vore betre, er søvnen.

— Særskilt fyrste natta var det mykje liv — truleg fordi dei var så spente på det som venta. Og så er jo ikkje nettene på leir det same som å sova heime i si eiga seng, seier organisten.

Ein del av opplegget

60 av dei 71 ungdomane i Kvam som skal konfirmera seg kristeleg til våren, var til stades på Framnes. Konfirmantleiren er ein del av opplegget for ungdomane, men ikkje obligatorisk. Ifylgje kateketen skal ungdomane delta på til saman 60 timar med undervisning, gudstenester og alternative opplegg før dei konfirmerer seg. For dei som ikkje var med på leiren ventar andre alternativ, forklara Andriamandimby.

På årets konfirmantleir var det totalt 227 konfirmantar og 140 leiarar frå KRIK og ulike kyrkjelydar som deltok.