Hyttejol på Kvamskogen: – Her vil me skapa nye tradisjonar

– Jola er ofte ekstremt travel. I år ser me fram til å verkeleg få roa ned og nyta dagane på hytta, seier Kyrkjebø.

Sundag møtte lokalavisa henne, sambuar Martinsen og borna hans – Vilde Sofie (10) og Selma (8) Bjørge Martinsen – på hytta deira på Kvamskogen.

Der var det ingen tvil om at gjengen var klar til jol. I den godt opplyste stova var fleire jolegåver allereie komne under joletreet. Peparkakehuset stod ferdig pynta på kjøkenbenken, og nissar, stjerner og annan «jolete» pynt var plasserte på bord, på golv og i vindaugskarmar. Og det knitra godt både i peisen inne i stova og bålpanna, ute på verandaen.

– Elskar Kvamskogen!

Medan Martinsen, som kjem frå Trøndelag, tidlegare ikkje har hatt noko spesielt forhold til hytter, har det lenge vore ein draum for Kyrkjebø å ha ei hytte på Kvamskogen. Bergensaren har vore mykje i området sidan ho var ung, både på dagsturar til fots og på ski.

– Om det var dårleg vêr, sa mor: «Me reiser på Kvamskogen! Der er det alltid fint vêr», fortel Kyrkjebø.

Ifylgje henne har det vorte mange kjekke turar og gode minne på «skogen». Dei siste tiåra har ho jamleg besøkt hytta til ei venninne.

– Eg elskar å vera på Kvamskogen! Det er ein flott stad på så mange måtar. Med reisetid på under éin time er det lett å reisa spontant på hytta. Og så er alle så hyggjelege her, seier Kyrkjebø.

Slo til

Då paret kom over ei ledig hyttetomt på Wallemtunet i nærleiken av Jonshøgdi, var ikkje Kyrkjebø i tvil. For henne auka behovet for ein stad å reisa til då pandemien braut ut, og det vart mykje tid på heimekontor.

Martinsen på si side trong litt tid til å tenkja seg om.

– Då Kristin fyrst la fram forslaget, sa eg ikkje ja med ein gong. Der og då var det ein del andre ting eg heller kunne tenkja meg å bruka pengar på, innrømmer Martinsen.

Etter å ha teke nokre rundar med seg sjølve, slo paret til slutt til. Sommaren 2020 kjøpte paret tomta. Våren knappe to år seinare stod den nye hytta klar til bruk.

Nyttar lokale krefter

I planlegginga var paret samd om kva som var viktigast: Hytta skal vera ein samlingsplass, ikkje berre for dei, men også for familiane deira. Difor var mellom anna talet på senger viktig. I hytta er det totalt fire soverom med til saman ti faste sengeplassar. I tillegg er det god plass til nokre ekstra madrassar, forklarar Kyrkjebø.

Paret har fått god hjelp av lokale krefter til å få den hytta dei har drøymt om. Det å handla lokalt og nytta lokal arbeidskraft har vore viktig.

– Me er jo på ein måte innflyttarar, og vil gje noko tilbake. Me har hatt eit tett og godt samarbeid med dyktige og trivelege folk for å koma i mål, seier Martinsen.

– Finna roa

Gjengen på fire ser fram til rolege dagar på hytta saman med familien. Vilde og Selma gler seg til leik og moro i snøen, og gjerne ein kopp varm kakao når dei kjem inn att. Og så er det jo veldig spanande med alle pakkane på julaftan, legg Vilde til.

For Martinsen er det å roa ned det viktigaste.

– Dette skal vera ein plass der me kan ta det heilt piano, senka skuldrene og setja av meir tid til kvarandre, seier trønderen.

På hytta skal det skapast nye joletradisjonar, fortel Martinsen. Nøyaktig kva tradisjonar det er snakk om, har han ingen klare tankar om enno. Fyrst må dei koma skikkeleg på plass i hytta og få gjennomført si fyrste jol der, seier han.

Også Kyrkjebø meiner at noko av det viktigaste med tida på Kvamskogen, er å få kopla av. Ho ser fram til lange frukostar og hyggjelege stunder både innan- og utandørs.