Har sommarjobb i Strandebarm
Lisa-Petie Evensen (21) kjem frå Finnmark, snakkar sørlandsk og tilbringar sommaren i Strandebarm. Med fire ulike jobbar vert det ikkje mykje fritid, men ho har rokke å bli forelska i den vesle bygda.
I fjor gjekk Evensen på friluftslinja «70 grader nord» på Alta folkehøgskule. Der vart ho god ven med strandbermingen Maria Øygard, som gjekk i same klasse. I løpet av året fekk elevane testa både kiting, klatring, kajakk og ski. I tillegg til vakker natur fekk dei oppleva både stjernehimmel og nordlys.
– Og så såg me perlemorskyer. Eg visste ikkje at det fanst, men det var så fint at eg trudde eg skulle dåna! fortel Evensen.
Då sommaren kom, hadde ho ikkje nokon stad å vera. Øygard ringde besteforeldra sine og spurte om veninna kunne bu i kjellarleilegheita deira i ferien. Evensen fekk jobb som sommarvikar på Strandebarm omsorg. Og slik gjekk det til at ei ny jente sette fot i den vesle bygda i juni.
– Det var nytt, kjekt og spanande. Eg hadde høyrt så mykje fint om Strandebarm, seier 21-åringen.
Fint hos «besto og besten»
Ho fortel at staden slo alle forventningar. Mange av dei lokale er nysgjerrige på kven ho er og korleis ho hamna her. Ifølgje Evensen er folk hyggelege og inviterer henne med på ting. Når det regnar, får ho tilbod om å verta køyrd til jobb så ho slepp å sykla. Evensen innrømmer at vestlandsvêret ikkje er heilt som på Sørlandet, der ho har gått på skule tidlegare. Men ho tykkjer det går fint uansett.
– Eg elskar verkeleg denne staden. Det er jo paradis! Det kan godt henda eg flyttar tilbake, fortel 21-åringen.
Finnmark står framleis øvst på prioriteringslista – det er jo heime. Men Evensen ser ikkje vekk frå at ho plutseleg kjem tilbake til Hardanger.
Evensen hadde ikkje møtt besteforeldra til Øygard før ho stod på døra og skulle flytta inn i kjellaren deira. Men i løpet av dei siste vekene har 21-åringen vorte godt kjent med «besto og besten».
– Dei er verdas hyggelegaste folk! Eg har aldri hatt det så godt som no, fortel Evensen.
Besteforeldra til Øygard stiller opp med heimelaga middag, jordbær, kaffi, strikkekos og prating.
Mykje nytt
21-åringen har aldri jobba innan helse og omsorg før, men fortel at ho likar å arbeida med menneske.
– Sjølv om det er vanskeleg å koma til ein ny stad og i ny jobb, er det også veldig kjekt! seier ho.
I tillegg til stillinga hjå Strandebarm omsorg har ho eit par vakter på Tyst pub & disko, Barmen og sommarkafeen i Strandebarm Marina. Det vert i snitt berre éin fridag i veka. Evensen tykkjer det er både slitsamt og artig.
– Eg får mange erfaringar, møter ulike menneske og lærer nye ting heile tida, fortel ho.
Ein gong fekk Evensen og Øygard eit guiding-oppdrag. Dei skulle ta med seg 16 belgiske turistar ut i kajakk og padla rundt i fjorden. Ein av turistane hadde vasskrekk, så Øygard passa på henne. Evensen fekk ansvar for dei resterande 15. Ho hadde ikkje erfaring med guiding og hadde aldri vore i Hardanger før. Men her sat ho altså som guide i ein kajakk i Hardangerfjorden.
– Eg tok det litt på sparket. Det vart litt oppspinn, men turistane var veldig nøgde, seier Evensen og smiler.
Belgiarane stilte mange spørsmål. Dei lurte på om heile Noreg ser slik ut og om det alltid er så fint vêr – dei trudde nemleg det skulle vera kaldt. Turen skjedde altså ein solskinsdag i juni.
Vil utrydda fattigdom
Til hausten skal Evensen og Øygard byrja på Hald internasjonale skole saman. Der ventar fyrst seks veker med studering i Mandal. Dei skal mellom anna fokusera på fattigdomsorientering og tverrkulturell forståing. I tillegg skal kvemmingane læra språket swahili.
– Kan du noko swahili frå før?
– Nei, er du galen? Eg tek det når det kjem, seier Evensen.
Frå Mandal set jentene kursen mot Tanzania, der dei skal bu i eit halvt år. Då skal dei jobba med born og unge, og utrydding av fattigdom saman med eit team som er stasjonert i Tanzania. Evensen er ferdig vaksinert og byrjar å innsjå kva som faktisk ventar dei i Aust-Afrika. Der er malariamygg, slangar og redusert tilgang på drikkevatn.
– Eg trur det vert kjempekjekt uansett, fortel 21-åringen.
Ho har vore i Cape Town og jobba med fattigdom tidlegare. Då arbeida ho på ein barneskule i ein månad. På kveldstid var ho med og arrangerte fritidsklubb for eldre born. I tillegg bidrog Evensen til å finansiera og byggja eit nytt klasserom.
– Det gav verkeleg meirsmak å vera der nede. Eg tykkjer det er eit viktig arbeid, seier Evensen.
Om eitt år er planen å ta eit årsstudium i samisk. Familien er samisk, og 21-åringen ynskjer å ta tilbake språket. I tillegg kjem det godt med dersom ho skal arbeida i den sosiale sektoren i Finnmark ein gong i framtida.
– Reising er jo kjekt, men heime er best, tykkjer Evensen.
