Gutane kastar seg inn i det

William Kristensen og Thomas Græsdal Pedersen er to aktive gutar frå Norheimsund. Begge er 11 år og går i 6. klasse på Norheimsund skule. Og så spelar dei på det einaste aktive laget i Kvam Handballklubb.

Kameratane tykkjer at handball er veldig kjekt. Faktisk så kjekt at dei klarar å ikkje tøysa vekk tida når dei er på trening, fortel dei.

— Me tullar ikkje, men fylgjer med og høyrer på trenaren, seier Thomas.

Målet til gutane er å verta skikkeleg gode. Når dei trenar, gjer dei mange ulike øvingar. Dei øver seg på å springa med ballen, å kasta og ta imot ballen, å ta ballen frå motstandarane og å skåra mål. I tillegg er det viktig å vera gode i forsvar. Då må dei hjelpa keeperen sin og passa på at ikkje motstandarane får mål.

Skårar mange mål

På gutelaget er det mange som spelar både handball og fotball. Treningane krasjar ikkje, så då er det mogleg å vera med på begge delar, fortel Kenneth Kristensen. Han er far til William og trenar for gutane.

— Kva er det som er kjekt med handball?

— Me får læra noko nytt, seier Thomas.

— Det at me gjer mykje forskjellig på treningane og prøver nye ting. Og så er det veldig moro å spela kampar, seier William.

Noko anna som er ekstra kjekt med handball, er at dei får skåra mange mål. Mange fleire enn det dei gjer når dei spelar fotball, fortel 11-åringane.

Ynskjer å få fleire med

Mor til Thomas, Tove Græsdal Pedersen, har sjølv spela handball, og hjelper Kristensen på treningane. Ho synest det er kjekt at gutane ynskjer å driva med idretten, og håpar at endå fleire vil vera med.

— Det er veldig kjekt at me har blitt ein gjeng. Me ynskjer at endå fleire skal hiva seg med! seier ho.

Dei fleste på laget er frå Norheimsund og Vikøy.

— Det hadde vore moro om me fekk fleire spelarar frå dei andre bygdene, seier dei to trenarane.

Gutane trenar kvar torsdag kveld i idrettshallen i Norheimsund, og i nokre helger spelar dei kampar. Og tenk; til no har gutane vunne alle kampane dei har spela!