Helland-Hansen-brør tok tre sølv

Eliteserien i volleyball vart ferdigspela i helga, og øystesebrørne Ask og Isak Helland-Hansen var med og sørgde for at Randaberg volleyballklubb skaffa seg sølvmedalje både i cupfinalen og i serien. Det er alltid litt bittert å tapa finalar, synest Isak, men han meiner dei må ha gjort noko rett for å få så gode plasseringar. - Me ville helst hatt gull, men er nøgde med sølv, seier han til HF.Laget låg an til ein 4.-plass før seriesluttspelet, men klara å slå serieleiarane Koll og kom seg dermed til finalesluttspelet mot Førde. I helga spela dei jamt (17-25, 22-25, 23-25), men Førde (3-0) hadde mest å gå på og kunne gle seg over seriegullet.På «allstarlaget» vart kaptein Ask Helland-Hansen kåra til beste diagonalspelar. Isak Helland-Hansen fekk æra av å verta beste kantspelar. Ask vart dessutan tildelt utøvarprisen for eliteserien. Veslebror Johannes Helland-Hansen (19) var kaptein for bergenslaget TIF Viking då det tok sølvmedalje mot Kristiansand sandvolleyballklubb i U19 i Stavanger 10. mars.

Familien Helland-Hansen har tre gutar og ei jente, Sunniva, som alle er oppvaksne med volleyball i Øystese. Eldsjeler i Øystese og i Rossvoll volleyballklubb har hjelpt dei fram. No som sesongen er over, skal dei gjera andre ting som er kjekt, mellom anna trena styrke og arbeida med den fysiske formen. Isak er assistentlærar og miljøarbeidar ved ein barneskule på Randaberg.

Håkon Norheimnorheim@hf.no