– Sei nei til grunnrenteskatt i havbruk!

Vestland fylkeskommune er ikkje formelt sett høyringsinstans i saka som gjeld skattlegging av havbruk, men fylkesrådmannen meiner likevel at politikarane bør melda seg på.Hans framlegg er å gå mot ein statleg grunnrenteskatt, tilrådd av fleirtalet i eit regjeringsoppnemnt utval, som kan hindra naudsynte investeringar i innovasjon innan auka berekraft. Han tek til orde for ein variert eigarstruktur som opnar for aktørar i ulike storleikar, slik at skattlegginga ikkje råkar dei minste meir enn dei større verksemdene.Vidare tilrår han å krevja at kommunane må sikrast føreseielege inntekter som kompensasjon for å yta areal til havbruk.– Inntektene i næringa er for tida rekord høge. Like vel er akvakultur framleis ei risikabel næring der utøvarane sjølve står for alt produksjonsutstyr, risiko og nesten alle innsatsfaktorane. Produksjonen er i hovudsak flyttbar og lokalitetsstrukturen er i stadig endring. Produksjonskostnadene for laks er høge og stigande, i motsetnad til mønsteret ein ofte ser i annan industriell produksjon. Mykje av dette er knytt til svært høge kostnader med å halda nede nivået av lakselus. Svak kronekurs og stor etterspurnad i marknaden har gjeve rekordhøg laksepris, som har kompensert for høg produksjonskost. Dette er faktorar som kan endra seg raskt, og det er viktig at næringa i periodar har høge marginar som buffer for uventa endringar i kostnader og marknader, skriv fylkesrådmannen i saksutgreiinga.

Hovudutval for næring, naturressursar og innovasjon drøftar saka torsdag, før fylkesutvalet skal vedta fråsegna fredag.